BAWRHSAPIN ZORAM DRIVERS’ UNION SUB-HEADQUARTERS SERCHHIP ASSEMBLY A HMANPUI


Dated Serchhip, the 30th December, 2016: Vawiin chawhma dar 11:30 hian Serchhip District Bawrhsap Dr.Lalrozama, IAS chuan Zoram Drivers’ Union (ZDU) Serchhip Sub-Headquarters Assembly, ZDU Serchhip Sub-Headquarters Building thar Tuikhuah Venga neih chu a hmanpui.

Khuallian Dr. Lalrozama chuan thu sawiin, ZDU in Building thar tha tak an nei chu a lawmpui thu sawiin, memberte thahnemngaihna leh inpekna fakawm a tih thu a sawi. Eng hna pawh thawk ila mahni hna hlen chhuah leh mahni nihna inhriat chian hi a tul ani a ti a, Driverte mawhphurhna hi a sangin a pawimawh a ni tih hi kan sawi fo ngai lovin an inhrechiang ani a ti. Hah taka hnathawk ni mahse hun vawng dik tura hma la zel tura chahin, midangte hun hlu tak pawt chhe theitu an nih hre reng turin a chah a. Mihringin kan tana tha tura kan ngaih zawng zawngte kan changin kan nei vek thei lova, kan awmna leh kan nihna apiangah lungawi ila, chutah chuan midang tana malsawmna kan lo ni thei zawk fo dawn ani tih hre thar turin kalkhawmte chu a chah bawk.

Mipuite him tlanna atan sawrkarin hma a laknate sawi hnawmtu ni mai lova midangte zirtirtu ni thin tura ngenin, sawrkar nena thawh hona tha tak neih puiah a sawm a, mipuite himna hi kan zavaia ngaih pawimawh tur a ni a ti bawk.

Pu T. Rosiama, Vice President, ZDU Sub-Headquarters Serchhip pawhin thu sawiin, ZDU hi Driver leh mipuite inkarah te, Driver leh Driver inkarahte, Driverte leh a ruaitu inkara harsatna awm thinte sut kian hna thawk tura lo ding ani a ti a. Tun hma chuan Driver kalkhawm chu Zu rui kalkhawm kan ni mai thin a, mahse ZDU a lo ding a, hma kan sawn zel a, hei hi kan thawh hona leh kan inzawmkhawm vang a ni a ti. Ram hmasawna atan hian a hnuk pawimawh tak kan ni tih hre reng ila, kan rawngbawlna ani tih hre chungin rinawm takin hna thawk thin ang u tiin kalkhawmte chu a chah bawk.

Pu Lalthlanthanga Chawngthu, Secretary chuan report a pe a. Sub-Headquarters zinga member tam ber niin member 405 an awm thu a sawi a, kumina an hmalakna tlangpuite sawiin Road Safety Week hlawhtling taka hmangin Kum 2015 atanga an sak tan ZDU Sub-Headquarters Building pawh peih fel tep a nih thu a sawi.

Assembly hi Pu S. Lalpianga, President in a kaihruai a, kumin chhunga an member chatuan ram panta mi 6 sunna hun hman a ni a, chawhnu lamah rorelna hun hmangin, rorel tur Agenda 3 an chhawp chhuak a ni.

Source: DIPR, Serchhip