KHUMTUNG KHUAIN BALHLA KUT AN HMANGA PU LALTHANZARA KHUALLIAN A NI


Dated Serchhip, the 30th November, 2016: Vawiin hian Khumtung khawtlang chuan hun rei tak hlawhtling taka Balhla an lo chin tawh avanga lawmthu sawina Balhla Kut an hmanga, Information and Public Relations Minister Pu Lalthanzara chu khuallian niin a ni hian Balhla Tukin kut hawnna a nei a, bialtu MLA Er. Lalrinawma chu Kut Pa a ni.

Kut hmanna inkhawm, Khumtung Bazar tuala neihah khuallian Pu Lalthanzara chuan, a tirah chuan Balhla Kut hman chu a tulna ka hre vak lova, mahse Khumtung khawtlangin Balhla an lo chinna rei tawh dante, an hlawhtlin pui ziate, State pawn thleng thlenga Khumtung Balhlain mi hriat a hlawh dante ka han hriat hnu chuan he khuain Balhla Kut an hmang hi thil tihawm tak, kum tina neih tlak niin ka hre leh ta a ni, a ti. Minister chuan, sawrkarin a tum ber chu kuthnathawktute tih hmasawn a ni a, chumi atan chuan Flagship Programme ah NLUP a duang chhuak a, kumin September ni 30 thleng khan chhungkaw 1,32,071 hnenah NLUP hi a pe tawh a ni; hei hi 2011 chhiarpui atanga teha Mizorama chhungkua awm zawng zawng za zela 59.47 zet an tling. Hei vang hian Mizoram mipuite annual income pawh a rawn sang ta hle a, kum 2008 a Rs. 38,522 chauh ni thin kha 2015 ah chuan Rs 97,780 a rawn ni a dawrh a, National Avarage aiin a rawn sang ta hial a ni, a ti a. NLUP avanga mipui hnena sum lut a tama a rualkhai bawk si avangin kohhran thawhlawmte pawh a pung nasa hle a, India ram Bank hrang hrangten an rawn hriaa Branch an rawn hawng chur chur mek a ni, a ti. Pu Lalthanzara chuan, Khumtung khua pawhin NLUP zara Balhla an thar chhuah belh nasa chu a lawmpui thu sawiin Balhla Kut chuan tam zawk, tha zawk leh hlawk zawka Balhla thar tumna lamah tiphur se a duh thu a sawi a, tangkai taka an hmang dawn phawt chuan sawrkar hmasawnna programme thar New Economic Development Policy (NEDP) atanga Balhla hmun panna Link Road laihsak a inhuam thu a sawi bawk.

Kut Pa, Er. Lalrinawma, bialtu MLA pawhin thu sawiin Khumtung khawtlangin hlawhtling taka kum rei tak Balhla an tharchhuah chu a chhuan thu a sawi a, hmana ram ruak mai ni thin, tun hnua Balhla hmun hlira a han changtate chu hmuhnawm a tih thu leh hmasawn zel tura bei chhunzawm zel tura Khumtung mipuite a duh thu a sawi.

He Kutah hian Serchhip Bawrhsap Dr. Lalrozama, IAS chuan kut hmang tura kalkhawmte lawmna thu (welcome speech) a sawi a. Kut hmang tura hmun hrang hrang atanga kal khawm te chungah lawmthu sawiin, Khumtung thenawm khawtlang hruaituten an tawiawm tha chu entawn tlak a tih thu a sawi . Dr. Lalrozama, IAS hian Khumtung Balhla chu Khumtung khua leh an khaw awmna a hriat hma daiha a lo hriat tawh thu sawiin, Khumtung Balhla a hmelhriatna hmasa ber chu State pawnah a nih thu a tarlang a ni.

Kut hmanna inkhawm hi Pu H. Lalthakima, VCP Khumtungin a kaihruaia, Pu Benjamin Lalawmpuia, Vice Chairman, Organising Committee chuan Balhla Kut an hman chhan a sawi a; Balhla Kut chu hlimhlawp siam ni nilovin lawmthusawina ni a nih thu a tarlang. Tin, Serchhip Divisional Horticulture Officer Pi Zosiamliani pawhin thusawina hun a hmang bawk. Hengte bakah hian zai leh lam chi hrang hrangin hun hlimaw tak an buatsaih a ni.

Khumtungah hian kum 1973 ah khan Pu Andrew Ngursawia te chhungkua chuan Balhla Kual hi bul khat lek phunin bul an tana, chuta tang chuan ching pung zelin vawiinah chuan chhungkua zawng zawng deuh thawin Balhla huan hi an nei chho ta a ni. Chhungtinte Balhla kung neihzat chawhrual hi kum 600-700 vel nia ngaih a ni a, kung 2000 chuang nei hi chhungkaw 30 vel an awm a ni. A tlangpuia chhutin Khumtung khua hian Balhla atangin kumtin Rs. 201 Lakh vel lalut ziah ang an ni a, a hralhna thuah hian World Bank kawng awm hma ang chuan awlsam chiah tawh lo mahse khaw hrang hrangah Outlet an siam avangin hralhna lam a harsa lutuk lo niin VCP Pu Lalthakima chuan a sawi a. Khumtung Balhla hi Indian Army hovin an duh bik avangin kumtin vawi khat tal chu tam tham takin min laksak thina, tlemin an lo ngam to zawk bawka, kan tangkai pui hle a ni, a ti bawk.

Vawiina Balhla Kut pual hian Khumtung Balhla hi 50% discount in an hralh a, tin tlai lamah Bawng 2, Vawk 1, Ar kg 30 leh Sangha kg 3 hmanga an buatsaih ruai tuihnai tak an kil ho a ni. Kut hman nan hian khawltlangin pawisa an thawhkhawm bakah bialtu MLA in Rs 50,000 a pe a, Horticulture Department in an tanpui bawk a ni.



Source: DIPR, Serchhip