SERCHHIP DISTRICT-AH VILLAGE COUNCIL INTHLAN TLUANG TAKA NEIH A NI


Serchhip, 30th April, 2015: Serchhip District chhungah Village Council inthlan tluang taka neih a ni a, tun tum inthlanah hian Polling Station 48 ah vote thlak niin harsatna leh boruak duhawm lo a thlen thu hriattur a awm lova, Election Observer Pu H.L. Rochungnunga, IAS pawhin vawiin khan Serchhip khawchhunga Polling Station hrang hrangte tlawhin a endik a, zaninah pawh riakin Vote chhiar zawh fel anih thleng a awmchilh ang. Election Observer hian nimin khan North Vanlaiphai Sub-Division tlawhin inthlan hmachhawn tura inbuatsaihna kalpui anih dan te a lo endik tawh bawk a ni.

Tarlan tawh angin Serchhip District a Village Council inthlanna neih turah hian General Seat 159 chuh turin candidate 443 an awm a, heng zinga 69 te hi Independent candidate an ni a, Reserved Seat (hmeichhiate tan bik) 56 chuh turin candidate 144 an awm a, heng zinga 20 te chu Independent candidate an ni a. General Seat leh Reserved Seat belhkhawm Seat 215 chuh turin Candidate 587 an awm a ni. Hetih lai hian Baktawng Tlangnuamah VC seat 5 awmin, VC inthlan neih ngai lovin Congress candidate 4 ( Gen 3 leh Reserved 1) leh MNF candidate (Gen 1) te chu chuhtu awm lova tlinga puan an lo ni tawh a ni.

Hetih lai hian New Serchhip Venglai YMA area a chengte chuan YMA hmalakna in New Serrchhip Village Council ramri then chungchanga an lungawilohzia leh an rilru natzia lan tir nan New Serchhip Venglai YMA Branch huamchhung In tinah leh kawtthlerah te puan dum tar a ni. New Serchhip hi Village Council khat ah awm thinin tunhnai khan New Serchhip North Village Council leh New Serchhip South Village Council ah te then a ni a, he Village Council ramri thar hian New Serchhip Venglai YMA Branch area chu a thendarh a ni.

Source: DIPR, Serchhip