SERCHHIP DISTRICT-A LOK ADALAT THUTKHAWM HMASA BER NEIH A NI


Serchhip 29th October, 2013: Vawiin chawhma dar 11:00 khan Serchhip District Legal Services Authority (SDLSA) hmalaknain Judicial Magistrate Pi Lalrochami Ralte, MJS office chamber ah Serchhip District-a a hmasa ber atan Lok Adalat thutkhawm a ni a, he thutkhawm hmasa berah hian thubuai (case) paruk ngaihtuah tura chhawpchhuah niin chung te chu leiba in thinna leh inpuhhmingchhiatna (facebook a intihhmingchhiatna thubuai pawh a tel) chungchang te a ni deuh ber.

Serchhip District Lok Adalat-ah hian member pali awmin chungte chu : 1) Pi Lalrochami Ralte, MJS, Presiding Officer/Secretary, SDLSA, 2) Pu K.L.Chhuanvawra, Serchhip, Prominent Citizen, 3) Pi K.Laldinpuii, Serchhip, Social Worker, 4) Pu. R.Lalhnuna, Serchhip, Sub-Headquarters YMA aiawh te an ni a; vawiina thubuai an ngaihtuah te hi District chhung khaw hrang hrang panga - Serchhip, East Lungdar, Thenzawl, Sialsir leh Sailulak atanga lut a ni.

Pi Lalrochami, MJS, Secretary, SDLSA, chuan Serchhip District-ah hian Ukil an awm loh avangin Aizawl District Legal Services Authority nen tangkawpin November, 2013 atangin mirethei thubuai nei, ukil rawihna tur neilo ten a thlawna Ukil an rawih theihna tur dap mek anih thu leh, hemi atan hian Aizawl lam atanga Ukil chah chhoh sak dan tur ruahmanna kalpui mek a nih thu a sawi a; Serchhip District chhungah Legal Awareness Campaign hmun ruk ah neih anih tawh thu leh Legal Aid Clinic hmun hnih ah hawn anih tawh thu te, Para-Legal Volunters Training hmun hnihah neih anih tawh thu te a sawi a ni.

Ruahman lawk dan chuan Lok Adalat thutkhawm vawi hnihna hi November ni 23 a neih tum a ni a, hetah hian thubuai chi hrang hrang ngaihtuah leh a ni ang.

Source: DIPR, Serchhip