SERCHHIP-AH “SWACHH BHARAT MISSION CLEANLINESS WEEK, 2015” HMAN DAN TUR REL


Serchhip, 29th September, 2015 : Vawiin chawhnu dar 1:00 khan “Serchhip Town Swachh Bharat Mission Cleanliness Week Committee, 2015” chu an Chairman, District Bawrhsap ni bawk Dr. Lalrozama, IAS hovin Serchhip DC’s Meeting Room-ah kumin October ni 2 - 9 chhunga “Swachh Bharat Mission Cleanliness Week” hman dan tur relin an thukhawm.

District Bawrhsap thar Dr. Lalrozama chuan a hna thar a zawm fel hnu lawka hetiang meeting pawimawh a kaihhruai hmasak ber ah member te tha taka an kal thei chu lawmawm a tih thu leh, District hmasawnna atan theihtawp chhuah tlanga an thawhho ngei a beisei thu sawiin Sawrkar official te leh tlawmngai pawl hruaitute, khawtlang hruaitute tawiawmna tha a ngen nghal bawk a ni.

Ruahman dan chuan “Swachh Bharat Mission Cleanliness Week” hawnna inkhawm hi October ni 2, 2015 (Zirtawpni) zing dar 7:00 ah Serchhip Bazar Kawn ah neih tur niin Serchhip District Bawrhsap Dr.Lalrozama, IAS in a hawng ang a, he hunah hian mipui a tam thei ang ber tel turin an sawm a, NCC, Bharat Scouts & Guides, NSS te bakah Tlawmngai Pawl hrang hrang te leh Village Council hotuten “Swachh Bharat Mission Cleanliness Week” hawnna inkhawm zawh veleh hian Serchhip Bazar leh a chheh vel tihfai hnatlang an nei chhunzawm ang. Hei bakah hian Faina Hapta hman chhung hian Serchhip khawpui huamchhunga Village Council zawng zawng te leh Sawrkar Pisa zawng zawng te chu an enkawl huamchhung tihfai hnatlang runpui nikhat tal nei theuh tura ngen an ni a, Serchhip khawpui huamchhunga Taxi Stand, Auto Rickshaw Stand leh Pick-Up Stand a ding thin te pawh an huamchhung theuh tifaia hnatlang turin an ngen nghal bawk a ni.

“Swachh Bharat Mission Cleanliness Week, 2015” kharna inkhawm hi October ni 9, 2015 chawhnu dar 1:00 ah Serchhip DC Conference Hall-ah neih tur niin he Week puala intihsiakna hrang hrang lawmman sem a ni ang.

Source: DIPR, Serchhip