SERCHHIP AH OPERATION MUSKAAN II TRAINING NEIH A NI


Dated Serchhip, the 29th July, 2016: Vawiin hian Serchhip SP Conference Hall ah naupang bo leh baihvai te zawnchhuah beihpui, Operation Muskaan II kalpui meka District chhunga hma latu leh a thawktu turte tana training buatsaih a ni.

He training hi Serchhip SP Pu Lalringdika'n a chuan hawngin Pu MS Dawngkima, Addl SP chuan inkhawm a kaihruai a, Nl Lalsiampuii, District Child Protection Officer chuan JJ Act chungchang zirtirna neiin Pu Lalchhuanawma Chhangte, SDPO chuan Cr. PC leh POSCO Act chungchang zirtirna a nei thung. Tin, Pu RL Chhuanawma, Chairman Child Welfare Committee chuan Operation Muskaan II chungchanga thil pawimawh hrang hrangte sawina hun a hmang bawk.

Vawiin vek hian he Beihpui kalpuitu tur Chhanchhuaktu/Chhawmdawltu Team (Rescue & Rehabilitation Team) te hian Serchhip District a Children’s home pahnihte UNITY Orphanage Home, Hmar Veng, leh ZOAR Urban Deprived Children’s Home, Dinthar Veng te an tlawh nghal a, Serchhip khaw chhung hmun pawimawh thenkhat tlawh kualin Field Operation an nei nghal bawk. Hun remchang hmasaberah Serchhip District chhung khaw thenkhat Thenzawl, N Vanlaiphai, East Lungdar, Chhiahtlang, Chhingchhip etc. ah te he Operation hi kalpui zel tur a ruahman a ni.

Operation Muskaan hi Ministry of Home Affairs, Government of India bul tuma neih niin July thla chhunga he beihpui hi District tina neih tura ruahman a ni a, a thawktu tur Team pawh hi Ministry of Home Affairs hian a rawn siam sa vek a, District tinah chung mite chuan hna an thawk mek a ni.

Source: DIPR, Serchhip