SERCHHIP-AH INDEPENDENCE DAY VAWI 69-NA HMAN DAN TUR REL


Serchhip, 29th July, 2015 : Vawiin chawhma dar 11:00 khan Serchhip DC’s Meeting Hall-ah kumin August ni 15-a Independence Day vawi 69-na Serchhip a lawm dan tur rel a ni a. Serchhip a Sawrkar Pisa hrang hrang hotute, Village Council leh tlawmngai pawl hrang hrang aiawhte an tel tha hle a ni.

Meeting hi District Bawrhsap mawhphurhna chelh mek tu Pu VL Remliana,MCS, Addl. DC chuan kaihruaiin kumin Independence Day lawmna inkhawm hi Khawtetlang khelmual, New Serchhip ah August ni 15, zing dar 10:30 ah tan tura ruahman a ni a, khuallian atan Sawrkarin Pu PC Lalthanliana, Minister of State chu a ruat a, kum danga tih thin ang bawkin Independence Day Parade neih leh tur niin, hetah hian Armed Contingent 2 (Mizoram Police & BSF) leh Un-armed/School Contingent 14 tel thei tura beisei an ni a. Parade hi endiktu tur ruat a ni ang a; a ti thate hnenah lawmman sem tur a ni ang.

Meeting-ah hian Independence Day lawmna atana thil pawimawh chi hrang hrang– Electric Power Supply, tui thianghlim in tur, First Aid, Pavillion siam leh chei dan tur te, Field chei dan tur te leh thil tul dang te uluk taka ruahman niin, mawhphurhna Department hrang hrang te leh tlawmngai pawl hrang hrangte hnenah sem rual a ni a, Independence Day zing karah Serchhip khawpui huam chhunga Home leh Institution hrang hrang thlan chhuah bikah te Independence Day lawmna thilpek sem a ni bawk ang.

Independence Day ah hian chhun dar 12:30 ah D.C Bungalow,Khawtetlangah ‘D.C’s at Home’ neih tura ruahman a ni.

Independence Day ah hian India hnam puanzar (National Flag) chu Department tin ten an pisa ah zing ni chhuah rual a tar vek tur niin ni tlak hma a seng leh vek turin a ni a, Sawrkar hnathawkte chu he ni hi ngaipawimawh a tel kim tura hriattir an ni bawk.

Source: DIPR, Serchhip