SERCHHIP DISTRICT VIGILANCE & MONITORING COMMITTEE THUKAWM


Serchhip, 28th September, 2015 : Vawiin nileng khan Serchhip DC Video Conferencing Hall ah Serchhip District chhunga Centrally-Sponsored Scheme kalpui anih dan endiktu Serchhip District Vigilance and Monitoring Committee chu an chairman Pu Ronald Sapa Tlau, Member of Parliament, Rajya Sabha hovin an thukhawm a, he hun hi Er. Lalrinawma, MLA, Tuikum Assembly Constituency, leh Pi Vanlalawmpuii Chawngthu, MLA, Hrangturzo Assembly Constituency ten an hmanpui a, Serchhip District a Centrally Sponsored Scheme kalpuitu Line Department te leh Tlawmngai Pawl aiawhte an tel tha hle a ni.

Meetingah hian DRDA kaltlanga hnathawh zing ami MGNREGS hnuaiah kum 2015-2016 kum kal mekah hian Serchhip District ah ni 10 chhung inhlawhna siam anih tawh thu report a ni a, Hna 217 (Serchhip R.D. Block – 120, E.Lungdar R.D Block – 97) thawh a ni a, Kum 2015-2016 chhung atan Serchhip R.D. Block huam chhungah tun thlengin Job Card 10759 pek chhuah a ni a, E.Lungdar R.D. Block huam chhungah Job Card 3305 pek chhuah a ni bawk. Tunah hian ni 25 dang inhlawhna tur Central sawrkarin State sawrkar hnenah sum a pe tawh a, heta tang hian Serchhip District tan ni 14 chhung hnathawhna tur pek chhuah tawh a ni.

Integrated Watershed Management Programme (IWMP) hnuaiah Project panga – IWMP Serchhip-I, IWMP Serchhip-II, IWMP Serchhip-III, IWMP Serchhip-IV leh IWMP Serchhip-V awmin IWMP Serchhip-VI leh IWMP Serchhip-VII tunah hian bul tan tura inbuatsaih mek a ni bawk.

UD&PA Department kaltlangin National Urban Livelihood Mission (NULM) hnuaiah Employment through Skills Training & Placement (EST&P) Programme kaltlangin Trade hrang hrang paruk ah beneficiary 365 thlanchhuah niin an zinga 130 hi Training pek tawh a ni a, Social Mobilization & Institution Development (SM&ID) hnuaiah Self Help Group 122 din niin member 1220 an awm a, an zinga 1198 hi hmeichhia an ni. Shelter for Urban Homeless (SUH) hnuaiah Serchhip khawpui huamchhunga Home pali thuam that tura ruahmanna kalpui mek a ni bawk a, Support to Urban Street Vendor (SUSV) hnuaiah beneficiary 112 chhinchhiah tawh niin tanpuina sum hmuh veleh tanpui an ni ang.

PMGSY chungchangah Chhingchhip-Hmuntha Road, Chhingchhip-Thentlang Road, Chhingchhip-Hualtu Road leh Hmuntha – Khawbel Road te pawh zawhfel tep an nih tawh thu tarlan niin East Lungdar – Sailulak Road pawh contractor-in harsatna a tawh te enpui anih thu leh uluk taka sawiho anih hnu in thla thar atang hian thawh chhunzawm lehnghal anih dawn thu leh uluk taka vil anih tur thu report a ni a, Lungpho-Hmunzawl Road leh Chhawrtui – Vanchengpui Road chu March, 2016 a zawhfel theih beisei anih thu te, Rullam – Lungpho Road pawh kumin December thla a zawhfel hman beisei anih thu tarlan ani bawk.

Sarva Shiksha Abhiyan (SSA) hmalakna tarlan zingah Swachh Bharat Swachh Vidyalaya programme kaltlangin kumin June thla atang khan District chhunga School 111 ah toilet thar tha tak Rs. 2,50,000/- man theuh sak anih thu leh heng zinga 93 chu sak zawh fel vek tawh anih thu dawn a ni a, a dang pawh hi October 15, 2015 a sak zawh vek theih beisei anih thu tarlan a ni bawk. SSA Mission Serchhip Distrct leh Sub-Hqrs YMA, Serchhip tangkawpin naupang kum 6-14 inkar sikul kai lo survey an neih ah naupang 64 lai an hmuhchhuah thu leh hemi chungchanga hmalak dan tur District Education Committee in a ngaihtuah dawn thu tarlan a ni bawk.

National Health Mission hnuaia hmalakna tarlan zingah May – August inkar khan nausen boral 9 an awm thu dawn a ni a, tun hnai kum hnih chhungin Nu nau chunga boral an awmloh thu tarlan a ni bawk. Serchhip District Hospital ah hian tun dinhmunah Doctor 15, Staff Nurse 51, Health Worker 65 (mipa-24, hmeichhia-41) leh ASHA 64 awmin khaw 42 an enkawl thu tarlan ani a, thawktu indaihlohna a nasat thu leh a bik takin Gynaecologist leh Padaetrician an mamawh thu sawilan a ni a, hei bakah hian Khawlailung PHC leh Ngentiang PHC ah te Doctor an awm loh thu sawilan a ni bawk a, Er. Lalrinawma MLA chuan heng PHC pahnih a thawk tur Doctor an awm anih chuan hmunpui lamin an rawih sak theih dawn thu leh a thawk tur Doctor zawk hi an la hmu theih loh thu a sawi a, bengvarpui turin NGO te leh official te a sawm nghal bawk a ni. Hei bakah hian Rajya Sabha MP Pu Ronald Sapa Tlau chuan Tuikum Assembly Constituency a “nghawngkawl area” an tih hmun kilkhawr zawka an harsatna te sawilangin MP Fund atang Ambulance pakhat ngaihtuah sak a duh thu a sawi a, hemi chungchanga buaipui ngai te lo ngaihven turin line department hotute a chah nghal bawk a ni.

District Vigilance and Monitoring Committee Chairman Pu Ronald Sapa Tlau chuan District a thawktu official te chu hmasawnna hna thawh kawngah ban pawimawh ber, a hmuna chenchilh a engkim hrechiangtu an nih avangin an pawimawh hle a ni tih a sawi a, NGO te pawh hmasawnna hna thawh te vil pui a ven ngai te venpuiah sawmin thawhhona tha tak neih zel a beisei thu a sawi bawk a ni. District chhunga Infant Mortality Rate tlahniam ta chu lawmawm a tih thu leh hemi atana theihtawp chhuah a beitute zawng zawng chunga a lawm thu a sawi a, Pa chin dan tharleh hlawk zawk Mizoram a kalpui anih theih nan a zirchiang turin kumin October thla hian Sawrkar Laipuia mithiam rual te nen Taiwan kal an tum thu a sawi bakah kaikuang lian chi Mizorama khawi anih ve theih nan hma lak mek anih thu te, hemi chungchang Training turin mi pali Thailand ah tirh tum anih thu te a sawi bawk. Rajya Sabha MP hian model village a siam tura a thlan Chhiahtlang khaw tan MP fund atang “high mast” pek a duh thu sawiin hemi chungchanga buaipui ngai lo bawhzui turin Serchhip DLAO a ngen nghal a ni.

District Vigilance and Monitoring Committee hi kum khata vawi li (Quarterly) thutkhawm tur a ni a, Lok Sabha MP Pu CL Ruala’n Mizoram chhim lam District a chang a, Rajya Sabha MP Pu Ronald Sapa Tlau hian Mizoram hmar lam District te a chang thung a ni.

Source: DIPR, Serchhip