SERCHHIP-AH NAUPANGTE KAWTHALO LAKA AN HIM THEIHNA TURIN BEIHPUI THLAK TAN A NI


Serchhip, 28th July, 2014: Hapta hnih awh tur “Kawthalo laka naupang an him theihna tura beihpuithlakna, [Intensified Diarrhoea Control Forthnight (IDCF)]” chu vawiin chawhma dar 10:30 khan JN Hospital Serchhip-a OPD-ah YMA Sub-Hqrs. Serchhip President, Pu RL. Chhuanawma’n a hawng.

Hawnna inkhawm hi Dr. Laldawngliana Sailo, CMO Serchhip District chuan kaihruaiin; Dr. Lalhlunpuii, Medical Officer, Nodal Officer ICDF chuan Kawthalo lakna naupangte himna tura hmalak dan hrang hrangte sawiin, naupang te an kua a thalo a nih chuan Nu te an pawimawh thu leh naupangte kawthalo laka an him theihna turin tui in tur leh ei leh in-ah fimkhur a tul thu te a sawi a, inthiarna tha neih a pawimawh thu leh inthiar zawha kut fai taka sil a pawimawh thu sawiin, kut fai taka sil dan tur a taka entirin kalkhawmte chu a zirtir nghal bawk a ni.

IDCF hman a nih chhung hian Serchhip District chhungakhaw tin leh veng tina ASHA te chuan an bial chhung theuha In tin tlawhchhuakin naupang kum 5 hnuailam awmna In ah ORS pack khat zel semin ORS siam dan leh kawthalo chungchang an zirtir ang a, ORS mamawh tan OPD, Health Sub-Centre leh Veng tina ASHA te hnenah lak tur a awm dawn bawk a ni. ‘National Health Mission’ leh ‘UN Millenium Development Goal’ chuan naupang thihna tihtlem hi a thiltum pawimawh ber anih mek lain India rama State tam takah khawthalo hi naupang nunna suattu lian tak ala ni reng a, Naupang kum 5 hnuailam ah khawthalo hian thihna 11% la thlen rengin rampumah kumtinin naupang kum 5 hnuailam nuai 2 velin an la thih phah reng anga chhut a ni.

Source: DIPR, Serchhip