PWD MINISTER-IN LEI PAHNIH HAWNG


Serchhip 28th March, 2015: PWD changtu Minister Pu Lal Thanzara chuan nimin chawhnu khan Chhingchhip-Hmuntha Road a Tuikum Lei leh Chhingchhip-Thentlang Road a Tuikual Lei a hawng a, Tuikum Assembly Constituency bialtu MLA Er. Lalrinawma pawhin Khualzahawm niin he hun hi a hmanpui a ni.

Lei hawnna inkhawm Tuikum Lei bula buatsaih ah Khuallian Pu Lal Thanzara chuan intlawhpawhna kawng a awm mumal loh avanga Tuikum ral khua te “Nghawngkawl Area” ti a sawi an nih thinna te Sawrkar leh mipuite tanrualna avanga tihtawp a lo ni thei dawn ta chu lawmawm atih rualin Tuikum ral mipuite chu a lawmpuina leh duhsakna a hlan a, Chhingchhip khaw mipuiten development work tluang taka a kal theihna tur anih pawt chuan ti a anmahni khawbil chauh nilo, rampum hmasawnna tura an ram te phal tak maia a thlawna an pe thin chu fakawm a tih thu leh entawntlak a tih thu a sawi a, a tha lam zawnga mipui an inlungrual phawt chuan hmasawnna hna thawh hi a awlsam bik a, a thim a var thlu lova chanchinbu lama insawisel vak vak chinte, political party te tan pawh mahni kutkawih anih loh vanga Sawrkar hmalakna insawiselsak reng ringawt te, kohhran, NGO leh Pressure Group hrang hrangte pawhin mahni bil ngaihtuah lova mi chi hrang hrang awmkhawm kan ni tih hria a thu lai la deuh a insawisel / infinchhuah kan thiam hunah hmasawnna kawng diktak chu mumal takin kan zawh thei dawn a ni a ti bawk.

Khualzahawm Er. Lalrinawma, Bialtu MLA ni bawk pawhin Tuikum rala chengte chu a lawmpui thu hrilh in fur ah leh thalah pawh buaina tawk tawh lovin an thawhrimna rah, an thlai thar te leh thildang te hmunpui lamah an hralh ve reng thei tawh dawn a ni a ti a, kut tlinglova sum lakluh beisei vanga hmasawnna hna thawh harsat laia a bial chhung hmasawnna tur compensation phut miah lova mi inphalte hnenah lawm thu a sawi bawk a ni.

Tuikum Lei leh Tuikual Lei te hi NLCPR Scheme 2006-2007 a Ministry of DoNER, Government of India in a sanction atanga thawh a ni a, heng hna pahnih te hi tender koh niin Mechfab Engineering Industries Pvt. Ltd., Guwahati hnenah pek a ni.

Tuikum Lei Built-Up Girder Bridge hi metre 45 a sei niin a loading capacity chu 24 tonnes (IRC Class 24R) a ni a, November ni 21, 2007 khan Lei sak hna hi thawh tan niin March ni 7, 2015 ah sak zawh a ni. Lei sakna work order hi Rs. 157.76 lakhs niin sak zawh anih thleng hian Rs. 83.49 lakhs (52.80 %) chauh hmuh a ni a, Contractor hian ama sum hman belh bakah sum remchang dang dapkhawmin Lei hi a sak chhunzawm a ni.

Tuikual Lei Built-Up Girder Bridge hi metre 40 a sei niin Tuikum Lei atanga metre 450 a hla, Thentlang kawnga Tuikual Lui chungah sak a ni a, a loading capacity chu 24 tonnes (IRC Class 24R) a ni a, November ni 21, 2007 khan Lei sak hna hi thawh tan niin October ni 18, 2014 ah sak zawh a ni. Lei sakna work order hi Rs. 184.62 lakhs niin sak zawh anih thleng hian Rs. 158.62 lakhs (85.90 %) chauh hmuh a ni a, Tuikum Lei ang bawkin Contractor hian ama sum hman belh bakah sum remchang dapkhawmin Lei hi a sa zo a ni.

Technical Report-a a lan dan in Project cost pumpui atanga 90 % hi Sawrkar Laipui tum tur niin, 10 % hi State sawrkar tum ve tur a ni a, heng Lei pahnih atana DoNER in sum a pekchhuah ang ang doletna hi State Sawrkarin a release ve zel a, hna thawh zawhna tura mamawh zat DoNER atanga hmuh anih loh avangin hna zawh hun a khawtlai phah a, sum la tang rih te pawh release thuai anih tawh beisei a ni.

Heng Lei pahnih te hi a tirah chuan Bailey Bridge tura estimate leh sanction a ni a, Bailey Bridge hi temporary Bridge niin a chhuat (decking) ah thing bleh thir chauh a hman theih a, Sawrkar hotuten Lei nghet zawk leh tlo zawk siam an duh avangin Built-Up Girder Bridge (BUG) in an thlak a, Built-Up Girder Bridge (BUG) hi permanent Bridge niin a chhuat (decking) ah cement concrete hman theih a ni a, a sei zawng in angah Bailey Bridge aiin a tlo zawkin a chak zawk a ni. Tuikum Lei hi dawh hnathawh kalpui mek anih laiin Hmuntha lam kam Ban (abutment) foundation ah tui awmna (water table) a pawnlang ani tih hmuhchhuah a ni a, a foundation nghet hmuh theih anih tak loh avangin design that leh niin Hmuntha lam kamah sawn hlat a ni a, Leri pawh hi a tira estimate aiin meter 5 in a sei phah ta bawk a ni.

Harsatna tam tak tawh anih lai leh hna thawh dan te thlak anih avanga a hun taka hna thawh zawh theih anih loh lai pawha harsatna siam sak lo leh phunnawi lova dawhthei taka nghak tu Tuikum ral khaw mipuite chungah PWD Department pawhin lawmthu an sawi a, Lei kilhna hmanrua leh hmanraw dangte pawh rukbo anih loh nana venpui turin an sawm nghal bawk a ni.

Lei pahnih hawnna inkhawm hi Pu R. Vanlaltluanga, E-in-C, PWD in a kaihruai a, Pu R. Lalrintluanga, S.E., Eastern Circle-in Technical report pe in Pu K. Lalsawmvela, C.E., PWD (Roads) in lawmthu sawina hun a hmang a, tlaiah Lei hnuai tiaupho ah khawtlang huap Lei thar lawmna ruai theh a ni.

Source: DIPR, Serchhip