SERCHHIP-AH SOIL&WATER CONSERVATION DEPARTMENT IN NLUP SEM


Serchhip, 27th November, 2014: Vawiin chawhma dar 11:00 khan Serchhip Hmar Veng YMA Hall-ah Soil & Water Conservation Department, Serchhip District chuan an hnuaia NLUP Second Phase tanpuina dawngtu te hnenah tanpuina sum an dawn hnuhnung ber tur Final Installment an sem a, District Bawrhsap Pi Juhi Mukherjee, IAS chuan he hun hi khuallian niin a hmanpui a, Pu Andrew H Lalremruata, MIS, DIPRO chu Khualzahawm a ni.

Khuallian District Bawrhsap chuan NLUP hlawhtlinna atana thawktu department te leh Beneficiary te thawhrimna a fak a, Serchhip District a kum hnih a awmchhungin NLUP avanga chhungkaw dinhmun hmasawn engemaw zat a mit ngei a a hmuh tawh thu a sawi a, Soil & Water Conservation Department hnuaia NLUP Trade pathum Hmunphiah, Coffee leh Rubber te chu sumchang thlai an nih avangin a tirah hlak nghal vut vut theih ani lova dawhtheihna neih a ngai a ni a ti a, tehkhin thu sawiin rangkachak khur tha tak an nei ani tih inhre turin a chah a, hlawkna a awm ani tih hre reng turin leh tanpuina sum an dawn tur zawng zawng an dawn kim tawh avangin a hlawhtlinna chu anmahni kut liau liau ah a innghat tawh ani tih vawng tlat turin a chah a ni.

Khualzahawm Pu Andrew H Lalremruata pawhin tanpuina dawngtute chu malsawmna an dawng ani tih hria a fimkhur tak leh uluk taka a hmanna tur diktaka hmang turin a chah a, NLUP dawngtu titha leh tithalo te pawh chanchinbu mite nen tangruala an vil reng tawh dawn thu leh a titha chawimawi tlakte chu midangte entawn tura an hnathawhte pawh uar taka puanzar sak an nih dawn thu leh a tithalote pawh chanchinbu mite nen an endik vek dawn avangin thuneitute tan pawh inhumhim tlat a harsat dawn thu a sawi bawk a, heng hi sawithaihna ni lovin hlawhtling tura thahnemngaihpuina atanga chhuak ani tih hre turin a chah bawk a ni.

Soil & Water Conservation Department hnuaiah hian NLUP Trade pathum Hmunphiah, Coffee leh Rubber awmin 2nd Phase ah beneficiary 239 (Hmunphiah – 154, Coffee - 35, Rubber – 50) an awm a ni.

Final Installment ah hian Hmunphiah thlangtute hian Rs. 36,120/- theuh dawngin Thlam sakna, Hlo thlawh vawi 3 na, Hmunphiah sengkhawm, tihro na leh Hmunphiah phorona tur sakna atana tangkai silpauline leina atana hman tur a ni.

Coffee thlangtute hian Rs. 21,300/- theuh dawngin an hnenah hian coffee tiak 2000 theuh a hma in pek an lo ni tawh a, tuna tanpuina sum an hmuh hikhur hnawh leh a tiak phunna atana te, hlo thlawh nan te, leitha man atan te, rannung thahna hlo leh a kahna man te, a hungna atan te leh thil pawimawh dang atana hman tur a ni ang.

Rubber thlangtute hian Rs. 33,200/- theuh an dawng a, Rubber chi hi kung 500 theuh pek an lo ni tawh bawk, tuna tanpuina sum an dawn hi lei luangral tur venhimna, hlothlawhna, meikawmg sialna, leitha pek na, coffee kung enkawlna, huan hungna leh a tul dang atana hman tur a ni.

Serchhip khaw pawn atanga beneficiary lo kal te hnenah an pawisa dawn tur hi Khuallian leh Khualzahawm ten an sem a, midang zawng chu an bank account ah dah luh sak vek niin APR ah beneficiary te hian an hming an ziah hnan a ni.

Vawiin NLUP sem inkhawm hi Pu Laltanpuia Varte, DSCO Serchhip in a kaihruai a, Pi Rosy Lalmuansangi Hmar, ASCO, Serchhip in report a pe a, Pi Lalsiampuii, DCPO in naupangte dikna chanvo leh zahawmna humhalh chungchang zirtirna a pek hnu in Pu JH Laldingliana, RO, Serchhip Range in lawmthusawina in hnu a khar a ni.

Ruahman lawk dan chuan Soil & Water Conservation Department hian naktuk ah Chhingchhip, Thenzawl leh East Lungdarah te NLUP hi an sem chhunzawm ang.

Source: DIPR, Serchhip