OBSERVER HOVIN ROLL SUMMARY REVISION KALPUI DAN ENHO


Dated Serchhip, the 27th October, 2016: Vawiin hian Serchhip DC Committee room ah Pu Zothankhuma, IAS Special Summary Revision of Electoral Roll 2017 neih meka Serchhip District leh Lunglei District Observer, hovin Serchhip District-a Electoral Registration Officer leh Assistant Electoral Registration Officer ten meeting an nei a. An hnathawh mekte an thlir ho.

Pu Zothankhuma chuan, Serchhipa Special Summary Revision buaipuitute chu anmahni hnathawh chin leh hmabak te hrechiang leh an hnaa inpe zo tak nia a hriat thu sawiin lawmthu a hrilh a. Tun thlenga an hnathawh chinah pawh a felfaiin hmuh a nuam hle a ni, a ti. Electoral roll hi kan ramah a pawimawh em avang leh khua leh tui dik takte chauh thun tur an nih avangin engtiklai pawha fimkhur turin a chah a ni. ERO leh AERO kalkhawmte hian an hnathawhna lama harsatna an tawh te, thil hriat duh pawimawh an neih te an zawt nghal a ni.

Kum 2017 Special Summary Revision atan hian kum 2016 Electoral Roll chu Draft Roll atana hmangin hemi behchhan hian Special Summary Revision hi kalpui mek a ni a. Draft Roll atanga a lan danin Serchhip District ah hian voters 46517 an awm mek a, chung zinga mi 23676 te chu hmeichhia an ni. Tuna Special Summary Revision 2017 kalpui mekah hian dilna chi hrang hrang 2000 a lut meka, heng zinga 1438 te hi Electoral Roll a chuan thar dilna a ni a, 375 te hi insawn leh harsatna dang avanga hming paih dilna a ni a, 394 hi hming leh nihna siamthat dilna a ni a, a dang 131 te hi veng/khua insawn dilna a ni thung. Heng dilna hrang hrang lutkhawmte hi ERO leh AERO ten tunah hian an enfiah mek a ni.

Source: DIPR, Serchhip