CHIEF MINISTER’s SPECIAL NLUP SCHEME VAWIINAH KALPUI TAN TA


Serchhip, the 27th August, 2013: Mi harsa zual te tanpui na tura siam, Chief Minister’s Special NLUP Scheme chu vawiin atang khan Mizoram pumah kalpui tan a ni ta a. He scheme launch-na programme, Serchhip D.C. conference hall-ah neih chu Chief Minister Pu Lal Thanhawla’n a hmanpui.

He scheme hnuaiah hian mirethei harsa zual, natna leh thil dang avanga hna thawk thei lo te chhawmdawl nan chhungkaw pakhat ah Rs.20000/- thleng tanpuina siam a ni a. A buaipuitu turin khaw tinah Village level Committee din a ni a. Vawiina he scheme dawng hmasa khua te chu Serchhip I, II, III IV & V te bakah Thenzawl East, Thenzawl North, Thenzawl West, Chhiahtlang, Bungtlang leh Keitum khua te an ni a. District dangah te pawh kalpui zui a ni ang.

Chief Minister Pu Lal Thanhawla chuan rambuai hun lai atanga tun thlenga Mizo mipui ten remna leh muanna nei tura Pathian kaihruaina an chan dan leh kawng hrang hranga malsawmna an dawn zui dan chhui letin NLUP chu chunglam malsawmna a ni tih hre reng turin mipui te a chah a. He programme hi hlawhchham pui lo turin rinawmna, dikna, leh Pathian tihna thinlung nen tanpuina dawngtu ten hma an lak a pawimawh, a ti a, NLUP hlawhtlinna vawrtawp chu a dawngtute kutah a awm a ni, a ti. NLUP kalpui hmasak chu hlawhtlin pui leh din chhuah nana hmang an tam tih sawiin hemi rual hian NLUP scheme tipuitling tura hna thawk theilo mi chhumchhia te chu hlamchhiah theih an ni lo, Pu Hawla chuan a ti a. Heng mi harsa zual te dawmkan chu ram hmasawnna kawnga thil pawimawh a ni, tiin Chief Minister’s Special NLUP scheme hnuaiah hna thawk tura theihna nei lo ten malsawmna an chang ve thei tur chu a lawmpui hle tih a sawi a. Mizoram in rahbi thar a kai a ni, a ti. Pu Hawla chuan ram hmasawnna peng hrang hrang atana sorkar hma lakna te pawh tarlangin Mizoram hma lam hun atan mipuite inbuatsaih turin a sawm a ni.

Chief Minister’s Special NLUP scheme kalpuina programme ah hian NLUP Phase II hnuaia autorickshaw thlangtu mi 21 hnenah Chief Minister chuan an document te hlanin D.C office tual zawlah a vailiam nghal bawk a ni.

Vawiinah programme hi Pu Lalsangliana Addl. D.C. Serchhip District in a kaihruai a. Pu P.Lthanga, Vice Chairman NLUP Implementing Board chuan keynote address sawiin Serchhip Bawrhsap Pi Juhi Mukherjee chuan welcome address a sawi a. NLUP Hmalakna hrang hrang tarlanna lehkhabu, “New Land Use Programme leh Kut Hnathawktute” tih lehkhabu chu Chief Minister hian a tlangzarh nghal a ni.

Source: DIPR, Serchhip