SERCHHIP TOWN AREA RATES & WAGES CONTROL COMMITTEE THUKHAWM


Serchhip: 27th July, 2012: Vawiin chawhma dar 11 khan Serchhip DC Meeting Room ah District Bawrhsap Pu P.Lalchhuanga hovin Serchhip Town Area Rates & Wages Control Committee an thukhawm a, Thingzai phelna rate an en nawn leh bakah Bawngsa rate sa zuar ten an zawm that theih nana hma lak dan tur an ngaihtuah bawk.

Serchhip Carpentry Workshop Owners’ Association ten thingzai phelna man 4”x4” phel phawk Rs. 15/- leh 4”x3” phel phawk Rs. 10/- ni tura STARWCC in a rel chu ennawn sak leh tura an ngenna uluk taka ngaihtuah anih hnu in leh ramchhung District hrang hranga rate hmanlai te thlir kual anih hnu in thingzai phelna rate atan 4”x4” phel phawk Rs. 20/- leh 4”x3” phel phawk Rs. 15/- hman turin rel a ni a, hemi rate hmanna tur order pawh Bawrsapin a tichhuak nghal a ni.

Bawngsa rate thar zawm that anih loh thu report awm chu ngun taka ngaihtuah niin ruahmanna thar siam a ni a, Village Council tin ten an area chhungah he rate hi dik taka hman anih theih nan hma an la tawh dawn a, August thla atang a bul tan theih ngei turin Joint VC Committee in ruahmanna a siam ang. Hetih lai hian naktuk 28th July, 2012 (Inrinni) zingkarah Serchhip bazarah Magistrate hovin Police te an duty ang a, sa rate leh buk lung hman dik anih theih ngei nan sa zuar te an vil ang.

STARWCC nih phung leh hmalakna mipui ten an hmelhriat lehzuala an thlawp that lehzual theih nan vawiin a meeting an neih zawh hnu 27th July, 2012 Chawhnu dar 1:30 ah NIC Video Conferencing Hall-ah Bawrhsap kaihhruaiin talk show buatsaih nghal a ni a, he talk show ah hian Bawng sa rate chungchang bakah mipui (consumer) te chanvo humhalh anih theih dan tur te pawh sawiho niin he talk show hi zanin ah vek hian Serchhip a Cable TV operator ten an tichhuak nghal dawn ani.



Source: DIPR, Serchhip