SERCHHIP AH ERONet TRAINING


Dated Serchhip, the 27th April, 2017: Vawiin hian Serchhip DC office ah Electoral Roll Online hmanga kalpuina Software thar ERONet hman dan District Election Officer Pi Sangchhin Chinzah leh Election buaipuitu officer pawimawh ten an zir ho.

Serchhip Bawrhsap leh District Election Officer ni bawk Pi Sangchhin Chinzah chuan, sawrkar hnathawkte chu inzir thar zel tur, thil thar rawn piang zel lo man thiam tura inbuatsaih tur kan ni a. Election thil phei chu ram inrelbawlna bulpui, hriatchian ngai tak a ni. Hei vang hian kan hriat tur chi thilte chu thiam nal vek kan tum tur a ni a, uluk takin engkim kan kalpui a tul a ni, a ti.

ERONet hi Election Commission of India in khua leh tuiten awlsam leh rang zawka Electoral Roll an buaipui theihna atana a buatsaih a ni a. Online hmangin hming thun tharte, siam that te, hming paih leh thil tul dangte tih zung zung theihna tura duan a ni. Tin, Offline hmanga dilna hrang hrang lutte pawh he ERONet hmanga umzui (process) zel tawh tur a ni dawn a. Hei vang hian ERONet ah hian Chief Electoral Officer atanga Data Entry Operator thlengin tih tur chanvo an nei theuh a ni. He ERONet hi kumin July atanga Electoral Roll Special Drive neih tan tur atanga hman tan nghal tur a ni ang.

Vawiina training naah hian Election Officer, Electoral Registration Officer, Assistant Electoral Registration Officer leh Operator ten ERONet a an hna chanpual theuhte uluk takin an zira, Pu Laltlanmawia, Master Trainer chuan zirtirna a pe a ni.

Vawiina training ah hian Pi Lalsangzuali Pachuau, Addl. DC (Addl DEO) , Pu Vanrangpuia Colney, SDO Sadar (ERO) Pu Abraham B. Khithei, Election Officer, Pu Vabeiamochhi Chozah, ASO (AERO), Pu Lalfakawma Chhakchhuak, DLAO (AERO) leh Pi Lalhlimpuii Ralte, BDO (AERO) te leh Election Branch a thawk mi dangte an tel a ni.

Source: DIPR, Serchhip