INTERNET CHUNGCHANG MEETING NEI


Dated Serchhip, the 27th February, 2017: Vawiin hian Serchhip DC Pisaah Bawrhsap Dr. Lalrozama, IAS hmalakna in Serchhip District a Government of India Undertaking Internet Provider - BSNL Serchhip Office hotute leh District Officer pawimawh ten Internet chak zawk leh changtlung zawk a awm theih dan tur sawi hona an nei a. Hmalak dan tur hrang hrang an rel.

Dr. Lalrozama chuan, Internet tel lo chuan sawrkar office ten hna kan thawk hlei thei tawh lova, hmasawnna hnathawh tam tak hi internet hmanga State thuneitu sang zawk leh Central thuneitute thlenga online-a in be pawh chunga thawh a ni deuh vek tawh a ni. Hei vang hian Serchhip leh Serchhip District chhung hmun thenkhata Internet lama harsatna kan tawh thin te rang taka kan siamthat a tul a. Hmalakna tur hna pawimawh vawiina kan rel ang angte March ni 2 a Member of Parliaments (MP) hova State Level meeting an neih ngaihtuah turin kan thehlut dawn a ni, a ti.

Pu Mohan Sethi, SDE, BSNL Serchhip chuan Serchhip District a BSNL dinhmun tlangpui report pein tunah hian District chhungah BSNL Mobile Tower hi 12 a awm mek a, siam lai pahnih a awm mek bawk. Tin, tun hnai mai khan Serchhip BSNL Office hi Optic-fibre Cable hmanga thlun zawm thar a ni a, nasa takin internet speed upgrade a nih thu sawiin tuna Broadband nei mekte hi chuan speed chak taka Internet an hman theih a beisei thu a sawi. Amaherawh chu Broadband Card lamah harsatna an neih avangin Internet Broadband connection dang pek belh thei dinhmunah an ding rih lova, Landline phone connection erawh chu a duh apiang tan a tih theih reng a, Leased Line conection pawh a duh apiang tana an pek theih reng thu a tarlang ani.

Hetianga BSNL office ten highspeed internet an pe chhuak mek nia sawi a nih lai hian office thenkhat internet an la hmang hlei thei lo an la awm a. Heng harsatna awm te sutkian nghal a nih theih nan Bawrhsap hian Broadband Connection line zawng zawngte en tha nghal vek turin BSNL thawktute chu a ngen a, a tul anga anmahni pui bawm turin Pu Vabeimozachhi Chozah, MCS, SDC chu a ruat nghal bawk.

Vawiina meeting ah hian Pu VL Remliana, PD, DRDA, Pu Vanlalrova, BDO Serchhip, Pu Lalremruata Sailo, ASO Serchhip, Pi Vanlalhruaii, CDPO Serchhip, Pu B. Lalrinsanga, DTO bakah NIC Serchhip, e-District & MSWAN Serchhip hotute leh mi pawimawh dangte an tel a ni.

Source: DIPR, Serchhip