SERCHHIPAH UNITED BANK OF INDIA BRANCH THAR HAWN A NI


Serchhip, 26th November, 2015 : Tukin zing dar 9:00 khan United Bank of India, Serchhip Branch thar chu Serchhip Tuikhuah Vengah Serchhip District Bawrhsap Dr. Lalrozama, IAS in a hawng.

United Bank of India Branch thar 70-na tur hawnna inkhawm tawi neihah hian khuallian Dr. Lalrozama, IAS, District Bawrhsap chuan thusawiin, Kum 1969 atanga din, UBI chu India ram Bank lian, changtlung leh rintlak a ni a, Serchhip khawtual ah ngei mipuite chhawr theih tura hawn alo ni ve ta chu lawmawm a tih thu a sawi a. Bank thenkhat leh Pawisa dahthatna rintlak loh tam takah kan chesual fo tawh thin tih hriain, India sawrkar hriatpuina hnuaia Bank changtlung tak hi hmang tangkai turin Serchhip District chhung mipuite a chah nghal bawk.

District Bawrhsap hian Bank hnathawhna tur khawlte tinungin, UBI Serchhip Branch-ah hian Bank Account a hawng nghal ani.

He Bank thar hawnna inkhawmah hian Mr. Janmeroy Dikshit AGM & Chief Regional Manager, United Bank of India, Cachar pawhin thusawiin, United Bank of India chu ram chhungah a inzar pharh chhoh zel thu te, North East-ah pawh Assam, Manipur leh Mizoramah Branch thar an hawn thar zel thu a sawi a. UBI hian ram chhung hmun 2000 chuangah ATM Booth nei tawhin tunlai thiamna leh Internet Banking system & Technology thar ber hmanga thuam anih thu a sawiin, Tuikhuah Veng, Serchhipah ATM Booth pawh dah anih thuai tur thu a sawi bawk.

Source: DIPR, Serchhip