SERCHHIP-AH MAIMAW PANGANG CHINGTUTE TAN TRAINING BUATSAIH


Serchhip, 26th October, 2015 : Research Extension Centre, Central Silk Board, Aizawl leh Serchhip District Sericulture Office tangkawp chuan Integrated Sericulture Development Project (ISDP) 2014-2015 hnuaia Serchhip District chhunga Maimaw pangang khawi tura thlanchhuahte tan nithum awh tur Training Serchhip DC Conference Hall-ah an buatsaih a, vawiin chawhma dar 11:00 khan he Training hawn inkhawm hi neih niin Serchhip District Bawrhsap Dr. Lalrozama, IAS chuan khuallian niin a hawng a ni.

Hawnna thu sawiin Bawrhsap chuan Sawrkarin mipuite tanghma ngaihtuahin theihtawp a hma la in, mitin in eizawnna mumal an neih theih nan kawng a dap thin a, a bik takin hmeichhiate a ngaipawimawhin a humhalh nasa hle a ni a ti a, Maimaw pangang chin chu eizawnna tling anih thu leh tihtak zeta beih erawh a ngaih thu a sawi a, mithimte rawn chunga fimkhur leh uluk taka hma lak ngai anih vangin mahni ngaihdan a kal ringawt lo tur leh harsatna an tawh pawh a mithiamte rawn zel nachang hre turin kalkhawmte a chah a, Training ngaihpawimawh a tul zia sawiin mithiamte chah chhuah a harsat em em laiin ni thum lai mai Scientist leh mithiam bik ten Training an pe thei tur chu an vannei hle a ni tih hria a rilru fim tak nen hlawkpui ngei tura rilru sawrbinga theihtawp chhuah turin kalkhawmte a chah a ni.

Vawiin Training hawn inkhawm hi Pu V. Zothansanga, DSO, Serchhip in a kaihruai a, Pu BN Chowdhury, Scientist ā€˜Dā€™, Research Extension Centre, Central Silk Board, Aizawl chuan Integrated Sericulture Development Project (ISDP) North-Eastern Region Textiles Promotion Scheme 2014-2015 kalphung leh Sericulture farmers te tana hamthatna awm te sawifiahna hun a hmang a, Pu C. Lianthanga, SEO, Serchhip in lawmthu sawina hun hmangin huna khar a ni.

Training hi chawhnu atangin neih nghal a ni a, Resource Person Dr. Lalthlamuana Pachuau, Scientist ā€˜Cā€™ in tunlai thiamna hmanga Maimaw pangang khawi hlawk dan chipchiar takin a zirtira, Training hi naktuk October ni 27 leh naktip October ni 28 hian neih chhunzawm a ni ang a, Pu C. Lianthanga, SEO, Serchhip, Pu Vanlaldinga, Attender, CSB, Aizawl leh technical staff dang ten training hi an pe ang.

Training ah hian Serchhip District chhunga khaw pasarih- Serchhip, Chhiahtlang, Thenzawl, Chhingchhip, Baktawng, Khawlailung leh Keitum atangin beneficiary thahnem tak an tel a ni.

Source: DIPR, Serchhip