MLA ELECTION LO AWM TUR PUALA DIN SERCHHIP DISTRICT MEDIA CERTIFICATION AND MONITORING COMMITTEE THUKHAWM


Serchhip, the 26th September, 2013: Kumin kumtawp Mizoram State Legislative Assembly inthlanpui lo awm tur atana din Serchhip District Media Certification and Monitoring Committee (MCMC) chu an Chairman, District Election Officer leh Bawrhsap ni bawk Pi Juhi Mukherjee hovin a office chamberah an thukhawm.

Vawiin thutkhawmah hian MCMC kalphung leh hnathawh dan tur te sawiho niin hmalak dan tur te pawh ruahman a ni a, Bawrhsap chuan MCMC chu thil thar anih avangin member tin te tanrualna leh thawhhona tha a pawimawh dawn a, tumah inthlahdah lo leh harsatna leh hriatthiamloh thilah pawh intanpui tawna in fuih tawn reng a pawimawh a ni a ti a, inthlanna dik leh felfai a awmtheihnan kan tih tur chanpual te dik taka tih hi kan thupui ber tur a ni a ti bawk.

Media certification and Monitoring Committee hi Election Commission of India in media kaltlanga Political Party leh Candidate te sum hman dan dik lo leh Model Code of Conduct an bawhchhiat te ven anih theihna tura a din a ni a, a bik takin Sum leh pai emaw therhlo dang emaw tawktarha tute emaw chanchin leh fakmawina Chanchinbu/Television a tihchhuah (Paid News) venna tur atana ruahman a ni bawk a, Election puan anih veleh atang chuan Political Party emaw, Candidate emaw in Media kaltlanga advertisement an tih dawn reng rengin MCMC phalna lak hmasak zel a ngai tawh dawn a; he Committee vek hian Media chi hrang hrang kaltlanga Paid News tihchhuah a ni nge nilo tih a vil reng bakah, Paid News chungchanga complain lut te a ngaihtuah ang a, thutlukna a siam thin dawn a ni.

Vawiin thukhawm chuan advertisement leh paid news chungchanga Election Commission of India thuchhuah te chu mipui te leh Media ten a hriatfiah tul ni a an hriat vangin hun remchang hmasa berah hemi pual hian Cable TV ah “Talk-Show” buatsaih ni se a ti a, hei bakah hian Model Code of Conduct chungchang leh thil pawimawh dangah pawh he Talk-Show hi buatsaih ni se tiin, heng hi CD a record a District chhung hmun tinah a tam thei ang bera chhuah chhawng turin Cable TV Network zawng zawngah pek chhawn a tum a, District Information and Public Relations Officer pawh hemi chungchang bikah hian Serchhip District chhunga chanchinbu mite lo kawm a, hrilhfiahna hun lo hmanpui turin a ruat bawk a ni.

Heng bakah hian MCMC in hna athawh theihna tura hmanraw mamawh te leh thil pawimawh dang tam tak sawiho a ni bawk.

Media Certification and Monitoring Committee (MCMC) hi chhawngthum : District, State leh Central level ah te din a ni a, a vawikhatna atan kum 2010 Bihar Assembly Election ah khan hman tan a ni a, India ram pumah hman zel tawh niin he ruahmanna thar hian kum 2010 atang khan Paid News do remna kawngah nasa taka hmasawnna a thlen a, kumin May thla a Karnataka Assembly Election ah khan Election Commission of India chuan MCMC kaltlangin Paid News Case 98 lai mai hmuchhuakin, Himachal Pradesh Assembly Election ah Case 104 leh Gujarat Assembly Election ah case 416 lai a hmuchhuak bawk a ni.

Source: DIPR, Serchhip