AH & VETY DEPARTMENT-IN NLUP TANPUINA SEM CHHUNZAWM


Dated Serchhip, the 26th August, 2016: Vawiin chawhma dar 11 khan AH & Vety Serchhip District chuan an Department hnuaia Vawk vulh thlangtute hnenah NLUP 3rd & 4th Phase a thawhkhatna New Serchhip YMA Hall-ah an sem chhunzawm.

He hun hi Dr. Lalmakthanga, Fodder Development Officer, Serchhip District chuan kaihruaiin, sawrkarin ruahmanna tha tak siamin eizawnna ngelnghet nei lo ten eizawnna tha tak an neih theih nan theihtawpin hma a la a. Tanpuina sum hi a nihna tur taka hmangte tan chuan malsawmna a nih laiin, engmah lova tlak ral mai maite tan chuan sawrkar atanga tanpuina sum beisei chhunzawm tur avang tawh ang, a ti. NLUP sum dawngtute chu tha taka hmang tura chahin tun tuma an sum dawn hi vawk in sak tur a ni a, an hma laknate enfiah sak an nih hnuah, hma la thate hnenah chauh vawkte man turte leh tul dangte pawh pek zui tur an nih thu a sawi.

Vawiina ah hian New Serchhip, Chhiahtlang, Sialhau, Lungpho, Ngentiang leh Rullam atangin chhungkaw 160 te hnenah tanpuina hi pek an ni a. Vawiin vek hian Tuikum cluster-a Baktawng Vengpui leh Chhuanthar, Darlawng, Tlungvel, Buhkangkawn leh Khumtung khuaa chhungkaw 57 hnenah leh Hrangturzo cluster-ah N. Vanlaiphai, Lungkawlh, Lungchhuan, Bawktlang, Khawlailung leh Sialsir khuaa chhungkaw 44 te hnenah sum hi sem a ni bawk. Sum sem hmasaka Rs. 10000 lo dawng tawhte hnenah Rs. 28000 pek niin, la dawng ve lo te hnenah Rs. 38000 theuha pek a ni a, an bank account-ah pawisa hi thun sak an ni. Ti hian AH & Vety Department hian an Department hnuaia vawk vulh thlangtute hnenah NLUP 3rd & 4th Phase thawhkhatna hi chhungkaw 457 te hnenah an sem chhuak a ni.

Dr. H. Vanlalrawna, Veterinary Officer chuan Kalkhawmte hnenah vawk in sak dan tur leh vawk enkawl dan chungchangah zirtirna a pe nghal a; Village Council member te leh Village Level Monitoring Committee member ten he hun hi an hmanpui zel bawk a ni.

Source: DIPR, Serchhip