CENTRAL SILK BOARD MITHIAM TEN SERCHHIP DISTRICT CHHUNGA SERICULTURE HMASAWNNA A HMUNAH EN


Serchhip, 26th July, 2014: Serchhip District chhunga Sericulture Department in Pangang vulh/khawi kawnga hna a thawh dan endikin Central Silk Board a Scientist rualin vawiin khan lehlangin Serchhip an tlawh a, Chhiahtlang leh Serchhip-a Institute of Village Linkage Programme (IVLP) Cluster hnuaia pangang khawitu te leh an Mulberry plantation te a hmunah kalchilhin an enpui a, hlawk zawka cocoon an thar theih dan tur te an sawipui a ni.

Vawiin a Scientist rawn kal te hi Central Sericulture Research & Training Institute (CSR&TI) atang Dr. S.K.Mandal, Scientist ‘D’ leh Dr. Debjit Das, Scientist ‘B’ an ni a, Central Silk Board Regional Extension Centre, Aizawl atangin B.N.Chowdhuri, Scientist ‘D’ leh Dr. lalthlamuana Pachuau, Scientist ‘B’ te an rawn kal a ni. Scientist te hian Serchhip District chhunga Sericulture Department hmalakna an thlirin Department leh Pangang vulhtu te thawhhona a tha tih an hriat thu sawiin lawmawm an tih thu an sawi a, tlang pang awih tak tak leh hmun rualrem lo tak takah pawh thahnemngai tak leh thawkrim taka pangang khawitute hmalakna an hmuh chuan chona thar nasa taka a pek thu sawiin an hmasawnna tur atana tangkai te theihtawp chhuaha bawhzui pui an duh thu an sawi a ni.

Vawiina Scientist rual lo kal te hi Pu V.Zothansanga, DSO leh a thawhpuiten Sericulture Office Complex, Kikawn a DSO Office ah an lo dawngsawng a, DSO chuan Government Sericulture Farm, Serchhipah hian Central Silk Board (CSB) nen tangkawpin Institute of Village Link Programme hnuaiah 3000 dfls Chawki rearing neih mek a nih thu leh, Institute of Village Programme (IVLP) kaltlang hian kar kalta khan NLUP Sericulture beneficiaries chhungkaw 150 te tan, 7500 Dfls (Disease Free Laying Eggs) semchhuah a nih thu te a sawi a, Serchhip a Cocoon Purchasing Centre atangin kumin chhung hian Reeling Cocoon kg. 340.5 Private Silk Farmer te hnen atangin lei anih tawh thu te a sawi bawk.

Tun dinhmuna Serchhip Purchasing Centre a Cocoon leina rate hetiang hi a ni :

MULBERRY COCOON :
Grade A (Cocoon 600 emaw a aia tlem emaw Kg 1 a nih in) : Rs. 200/- per Kg.
Grade B (Cocoon 601 atanga 800 inkar Kg 1 a nih in) : Rs. 150/- per Kg.
Grade C (Cocoon 801 atanga 1000 inkar Kg 1 a nih in) : Rs. 120/- per Kg
Grade D( Cocoon 1001 atanga 1200 inkar Kg 1 a nih in) : Rs. 100/- per Kg.
Kg. 1 a Cocoon 1200 chin chunglam anih chuan Rs. 60/- per Kg in lei thin a ni.

MUGA COCOON
Grade A (seed) : Re. 1/- per Cocoon
Grade B (non-seed) : Re. 0.90/- per Cocoon

ERI COCOON
Seed Cocoon : Re. 0.50/- per Cocoon
Pierced Cocoon/hand-opened : Rs. 250/- per Kg
Cut Cocoon : Rs. 215/- per Kg

TASAR COCOON
Seed Cocoon : Re. 1/- per Cocoon
Reeling Cocoon: Re. 0.40/- per Cocoon
Tasar pierced Cocoon : Rs. 220/- per Kg

Source: DIPR, Serchhip