MUALCHENG IN KHAWFAI LAWMMAN AN LAWM


Serchhip: 26th July, 2012: Serchhip District a Mualcheng khua chuan vawiin chhun khan Sawrkar Laipui a Ministry of Drinking Water & Sanitation buatsaih khaw fai lawmman “Nirmal Gram Puraskar 2011-2012” an dawn chu Mualcheng Community Hall-ah khawtlang huapin an lawm a, District Bawrhsap Pu P.Lalchhuanga chuan he hun hi khuallian niin a hmanpui a ni.

Bawrhsap chuan Mualcheng khaw mipuite chu khawfai lawmman an dawn avanga a lawmpui thu hrilhin, khawfai an nih mai bakah nungcha leh ramngaw humhalh kawnga Mizorama khaw langsar leh hmahruaitu an nit el bawk chu lawmawm a tih thu leh entawntlak an nih zia a sawi a, Varhva Lui a sangha an humhalh dan te chu chhuanawm a tih thu a sawi bawk.. Bawrhsap chuan Mualcheng khaw mipuite chu tuna an hlawhtlinna hmuh hi duhtawk mai lo turin leh hlawhtlinna nasal eh zual nei turin a chah a, an khawtlang tanrualna, lungrualna leh inpekna an chhawm nun zel phawt chuan Mizorama khaw entawntlak ber “model village” an nih theih hial a rin thu a sawi a ni.

Bawrhsap chuan changkang tur chuan sawrkar leh sawrkar aiawh thuneitu ten khawtlang thatna tura dan leh hrai an zam te zawm that a pawimawh thu sawiin, ran vulh, abikin ui leh ar khawlaia tlat tir phal anih loh thu leh he dan an zawm that phawt chuan khawchhunga an thlai chin te leh khawchhung faina pawhin hma a sawn leh zual ang tih a sawi bawk. Bawrhsap hian Mualcheng Health & Sanitation Committee hnenah lawmpuina tangka fai Rs. 5000/- a hlan nghal bawk a ni.

Mualcheng khua hi kum 1972 atanga luah tan niin tunah hian in 271 a awma, mihring 1500 vel an cheng mek bawk a, zirna In Government Primary Sikul pahnih, Middle School pakhat leh High School pakhat a awm a, Health Sub-Centre pakhat leh Anganwadi Centre pathum a awm mek bawk a ni. Mualcheng khaw daiah hian Park nuam tak tin 50 hmun vela zau khawtlangin a nei a, hei hi zauh belh zel tumin ruahmanna an siam mek bak ah, Mualcheng khawchhunga YMA Branch tinin an huam chhungah mini-park nuam tak an nei vek bawk a ni.

Nirmal Gram Puraskar 2011-12 hi Mizoram chhunga khaw 53 an dawnga khaw mipui tam dan a zirin lawmman dawn zat hi a in ang lova, Mualcheng khua hian Trophy leh Tangka fai Rs. 50000/- an dawng a ni.



Source: DIPR, Serchhip