SERCHHIP-AH NLUP HNUAIA HMUNPHIAH THLANGTU TE INFUIH THARNA HUN HMAN A NI


Serchhip: 26th June, 2012: Soil & Water Conservation Department, Serchhip District buatsaihin vawiin khan Serchhip Hmar Veng YMA Hall-ah Serchhip khawchhunga NLUP hmunphiah thlangtute tan infuihtharna hun leh inkawmhona hun hman a ni a, Serchhip khawchhunga NLUP hmunphiah thlangtu te an kal tha hle a ni.

Vawiin hun kaihruaitu Pu H.L.Chungnunga, D.O.(Soil), Serchhip District chuan NLUP hmunphiah thlangtute chu thahnemngai tura fuihin kum 2011 chhunga Serchhip District atanga NLUP hmunphiah thar chhuah quintal 312 chu a let a tam kumin ah chuan tharchhuah anih ngei a beisei thu a sawi a, Hmunphiah atan bik second phase beneficiary te thlan fel an nih leh tawh thu sawiin, heng thlan thar te tana entawn tlak leh zir tlaka hma la chhunzawm zel turin a chah nghal bawk a ni.

Serchhip District chhunga NLUP hmunphiah thlangtute hi Cluster thum (Serchhip, Tuikum leh Hrangturzo) ah then an ni a, NLUP first phase ah hian Serchhip Cluster ah beneficiary 114, Tuikum Cluster ah 99 leh Hrangturzo Cluster ah 52, an vaiin beneficiary 265 an awm a ni. Hmunphiah thlangtu chhungkaw tin hnenah tanpuina pawisa Rs. 73,500/- theuh pek an ni tawh a, Serchhip Cluster a pawisa semchhuah tawh zawng zawng chu Rs. 5,497,080/- a ni tawh a, Tuikum Cluster ah Rs. 4,773,780/- sem tawh niin Hrangturzo Cluster ah pawh Rs. 2,507,440/- semchhuah tawh a ni bawk.

Kum 2011 chhung khan Serchhip Cluster ah hmunphiah kuang (broomstick) quintal 223, Thenzawl Cluster ah quintal 32 leh Hrangturzo Cluster ah quintal 38 hralh chhuah a ni a, Serchhip khawchhung bikah hian NLUP hmunphiah thlangtu mi 82 an awm a, Serchhip VC-I, VC-II, VC-III, VC-IV, VC-V leh New Serchhip VC area atang te a thlanchhuah an ni.

Vawiin infuihtharna hunah hian beneficiary te pawhin an harsatnate leh hmalak chhunzawm zel an duh dan te an sawihova, Serchhip khawchhung ngeia an hmunphiah tharchhuahte hralh anih ve theih nan a kawng dap pui tura sawrkar an beisei thu te, leh Serchhip khawchhung ngeia an hmunphiah tharchhuahte dahkhawmna tur kudam (Godown)an mamawh thu te sawilan a ni a, beneficiary te chuan hmunphiah chingtu te Sawrkarin hma a lakpui danah lawmawm an tih thu sawiin, hlawhtlinpui ngei an in beisei thu te an sawilang bawk a ni.



Source: DIPR, Serchhip