SERCHHIP-AH DISTRICT FOOD SECURITY MISSION COMMITTEE THUKHAWM


Serchhip, 26th April, 2016 : Vawiin tlai dar 4:00 khan Serchhip District Food Security Mission Committee chu an Chairman, Serchhip Bawrhsap ni bawk Dr. Lalrozama, IAS pisa ah an thukhawm a, Serchhip District chhunga hman tur Annual Action Plan for National Food Security Mission an sawiho.

National Food Security Mission (NFSM) kaltlanga Serchhip District buh leh bala a intodelh theihna tura ruahmanna hi Sawrkar Laipuiin kaihhruaina a siam tlawhchhana buatsaih a ni a, NFSM-Rice, NFSM-Pulses leh NFSM-Coarse Cereals ah then hran niin heng hnuaiah te hian Serchhip District chhungah beneficiary farmers thlanchhuah an ni ang a, heng thlanchhuah te hian Buh, Chana leh Vaimim a engemaw ber hi an huan/Lo/Leilet ah mithiamte kaihhruaina hnuaiah tunlai thiamna thar ber ber hmangin an ching ang a, a hlawkna hmuh tur a awm anih chuan loneitute hnenah he thlai chin hlawk dan hi zirtir chhawn niin buh leh bala intodelh tura hma lak chhunzawm ani dawn a ni.

NFSM-Rice hnuaiah hian Cluster Demonstration of Rice scheme siam niin buh chin dan chi hrang hrang Line Transplanting (31 hectares), System of Rice Intensification (SRI) (25 hectares), Hybrid Rice Technology (15 hectares) leh Rice-based Cropping System (16 hectares) enchhin tur a ni a, heng atan hian Rs nuai 8.795 ruahman a ni.

NFSM-Pulses hnuaiah hian Cluster Demostration of Pulses scheme siam niin Kel Ek chana (Chick Pea) (3 hectares), Bethu (Rajmash) (15 hectares), Motor Chana (Field Pea) (15 hectares) leh Pulses based Cropping system (20 hectares) enchhin tur niin senso atan Rs. nuai 5.8625 ruahman a ni.

NFSM-Coarse Cereals hnuaiah Vaimin chin hlawk dan tur ruahmanna siam a ni a, High Yielding Varieties (32 hectares) leh Hybrid (32 hectares) enchhin tur niin senso atan Rs. nuai 3.20 ruahman a ni.

Heng beneficiary thlanchhuah te hi Training tha taka pek an nih bakah uluk taka vil zui reng an ni dawn a, anni bakah hian KVK, North Vanlaiphaiah pawh heng thlai chin hlawk dan tur hi zirchian a enchhin a ni bawk ang.

Serchhip District Food Security Mission Committee hi District chhunga National Food Security Mission Annual Action Plan bawhzui a vil zui tura din niin District Collector/Bawrhsap chu Chairman a ni a, District Agriculture Officer chu Member Secretary niin member atan Agriculture-allied Department zawng zawng bakah AMFU, NGO leh Progressive Farmer te an tel a ni.

Source: DIPR, Serchhip