BAWRHSAP HOVIN SERCHHIP KHAWPUI TUI HARSATNA CHUNGCHANG SAWIHO


Serchhip, 26th April, 2016 : Serchhip khawpui chawmtu Tuikum lui a nut nasat avanga Serchhip khawpuiin tui harsatna a tawh chungchang vawiin chawhma dar 10:00 khan Serchhip Bawrhsap Dr. Lalrozama, IAS hovin a pisa ah sawiho a ni a, Pi Teresy Vanlalhruaii, Project Director, DRDA, Er. Lalhruaia, EE, PHE Serchhip WATSAN Division, Pu R. Vanrengpuia, SDO (Sadar), Er. K.Lalrintluanga, SDO (M), PHE Serchhip WATSAN Division, Pu Andrew H.Lalremruata, DIPRO leh PHE Department staff te he sawihona ah hian an tel a ni.

Bawrhsap chuan Serchhip khawpui chawmtu Tukum lui a nut nasat vanga Serchhip khawpui harsatna tawh chu mipui leh sawrkar tan pawh manganthlak anih avangin Sawrkar Department hrang hrang leh mipuiten hma an lak hona tur leh an tanhona tur ngaihtuah a tul a ni a ti a, tui nut chhan ni awm a lang te leh tui harsatna sut kian dan tur hrang hrang sawiho a ni.

Er. Lalhruaia, EE, PHED chuan tui harsatna hi kar hnih chuang anih tawh thu a sawi a, tui harsatna chhan sawifiahin Tuikum Lui tui pump nan hian electric pump 250 kw leh diesel pump kum 20 chuanga upa an hmang a, diesel pump hi darkar 2 vel hman hnu ah rei fe hahchawlh tir zel a ngaih avangin duh angin a pump chak theilo a, electric pump hi an innghahna a nih laiin a load mamawh a sang em em a, Bukpui sub-station atang power supply an hmu thin a, amaherawhchu duh ang tawka tui pump turin an mamawh ang power supply an hmuh thei thin lova, P&E Department te pawhin ngaipawimawh thin viau mahse electric pump chawm tha tur chuan khaw thenkhatin an tawrh a ngai zel thin a, hei vang hian tui duh ang thalin an pump theilo thin a, chutih laiin tun thla tir lam khan Zuangtui Sub-station siamthat anih vangin ni hnih chhung tui pump theih anih loh bakah ruah bawhawk nasa taka a sur bawk avangin Tuikum Lui a nut belhchhah a, harsatna a thuah hnih a ni a ti a, kum danga ruah a sur a lui tui a nut hi chuan ni hnih/khat hnu ah a fim leh mai zel a, tun tuma Tuikum Lui nu hi chu ruah sur loh hnu ni engemawzat thlengin a nu reng mai bawk si a, tui tihfimna damdawi hmanga theihtawp an chhuah chung pawhin an beisei ang a phalo thin a, damdawi pawh nidang aiin an telh tam deuh hlek a ngaih phah a ni a ti a, hetiang anih hian tui hi nidang aiin a mawm deuh hlek thin a, mahse laboratory ah uluk taka an test reng avangin mihring tana hlauhawm lo chin zelin an thlifim tih a sawi bawk. Serchhip khawpui hi kar khata vawi khat theuh tui sem kim turin Thawhtan atanga Zirtawp thleng an tuam chhuak thei a, nikhat tui sem a khaihlak palh chuan kar khat dang nghah a ngai thin a, hetih lai hian power supply hmuh that loh vang leh lui tui a nut nasat avanga ni engemawzat tui pump that theihloh anih takah chuan tui sem chungchang harsatna pawh hi a buaithlak lehzual a, tui harsatna a reh tan deuh a an hriat hnu ah kar hmasa khan ni thum chhung (April 19-21) power supply hmuh mumal loh ani leh a, ruah sur vangin tui a nu belhchhah leh bawk a, chu chuan harsatna a thlen belh leh ani a ti bawk.

PHE department a thawkte hian ruah sur loh hnu pawh a tui a nut reng chhan hriat tumin Tuikum hnar thleng an fang chhuak tawh a, tui nu hi 6 ntu chin hi thlitfim atan him tawk a ngaih a ni a, Hmuntha kai lui hnar lamah pawh tui nu an hmu a mahse 4 ntu chauh anih vangin a him a, tuna tui pump na hmun lam a tui nu erawh 10 ntu lai ala nih avangin a mangan thlak hle in an hria, Tui pump tur an khuapna "Weir" hi metre hnih a thuk niin hetah hian chirhdiak (leivung chirh) feet 1 vel a awm a, JCB ruaiin kartawp chawlh pawh hmang hman lovin an paihfai a amaherawh chu lui dung tluan a chirh hi a awm ni a an hriat vangin fur ruahtui tam chho tur nen hmalak a hautak dawn hle a ni an ti a, nikum fur ruahtui tlak hnu a lui hnar lama construction work hrang hrang vanga leivung paih inchhekkhawl ruah tuiin a len thlak vanga tui hi nu anih leh nih loh zirchiang turin hma an la mek bawk a ni.

PHE Department hotute chuan power supply a awm that a khuanu in zah a ngai anih chuan zawi zawiin tui harsatna pawhin ziaawm a pan an beisei thu an sawi a, mipuite pawhin an harsatna te hriatthiam sak tura an ngen tak meuh thu leh theihtawp an chhuah thu an sawi bawk.

Tui harsatna su kiang tura rawtna hrang hrang sawiho niin Tuikum lui hnar lama construction work thawh reng reng ah uluk taka thil awmzia inhrilhfiah a, tui nu tawh sa belhchhah lo tura kawng laih leh leivung paih te fimkhur tura in ngen a that thu sawi a ni a, tui pump na tura power supply mamawh ang hmuh anih theih nan Power & Electricity hotute hnenah ruahmanna thar ngaihtuah sak tura ngen tum a ni a, mipui hnena tui semchhuah reng reng ni dang aia a mawm deuh emaw thildang deuh a awm anih pawhin mihring hriselna atana hlauhawm lo ani tih hre turin mipuite an ngen a, laboratory ah uluk takin an endik reng ani tih sawi a ni bawk. Hei bakah hian diesel hmang tui pump khawl thar thla 6 chhunga neih anih dawn thu sawilan niin hman tangkai anih hnu chuan Serchhip khawpuiah tui harsatna a awm tawh dawn lo a ni.

Bawrhsap chuan tui harsatna dinhmun hrethiam tura mipuite ngen nawn leh in ruahtui dahkhawl nachang hriat a pawimawhzia hre thar a ngaipawimawh turin a ngen bawk a, Sawrkar chuan mipuite tana thawk an ni tih in hre reng chungin an hmanraw neih ang ang te hmangin theihtawp an chhuah reng ani tih hria a dawhthei taka nghak turin mipuite a ngen a, tui thianghlim mipuite pe turin PHE Department hotuten tui pump na hmunah an vil reng a, a tul chuan tui pump hna chawl a hmalak pawh ngai thei dinhmunah an ding ani tih hrethiam tura mipuite chah in tui renchem taka hmang rih turin a ngen bawk a ni.

Source: DIPR, Serchhip