CHHIAHTLANGAH PARTICIPATORY RURAL APPRAISAL (PRA) EXERCISE NEIH A NI


Serchhip, 26th February, 2015: “MP Model Village” SAGY Programme kalpui mekah State Istitute of Rural Development (SIRD) buatsaihin Rajya Sabha MP Pu Ronald Sapa Tlau-in Model Village a siam tura a thlan Chhiahtlang khua tihhmasawnna tur ruahmanna (Village Development Plan) siamna tur atana inbuatsaihna pakhat Participatory Rural Appraisal (PRA) Exercise chu vawiin nilengin Chhiahtlang Community Centre, Chhiahtlang Chanmari Vengah neih a ni a, he hun hi District Bawrhsap, SAGY Nodal Officer ni bawk Pi Juhi Mukherjee, IAS in a hmanpui a ni.

District Bawrhsap chuan kalkhawmte hmaa a thusawiah Village Development Plan chu uluk taka siam a tul thu leh a zavaia tihhlawhtlin pawh thil awlsam tak anih dawn loh thu te, khawtlang mipui inlungrualna tha leh anmahni viltu Sawrkar Department hrang hrangte nena thawhhona tha an neih bakah anmahni thlangtu M.P. an thawhpui thiam danah thui tak a hlawhtlinna chu a innghah dawn thu a sawi a, model village ni tur chuan khawtlang mipuite hrisel that bakah chet felfaite, nunphung zahawmte neih a ngaih dawn avangin tih tur a tam hle a ni a ti a, abikin meizuk hi mizo culture a bet ni mahse hriselna atana thalo anih si chuan kan kalsan ngam a tul tho tho a, thalaite in volunteer in zuk leh hmuam do kawngah tan la thar se a duh thu te a sawi a, BPL family te APL family dinhmuna hlan kai chu an thupui ber pakhat nise a duh thu te a sawi a ni.

PRA Exercise hi Pu Khawlsiamthanga Khawlhring Deputy Director SIRD, Dr Lalhruaitluangi Sailo, Core Faculty, SIRD leh Pu ZR Thafala, Core Faculty, SIRD ten kaihhruaiin Community Centre chhuatah Chhiahtlang khaw Map ziah a ni a, chumi behchhan chuan khawtlang aiawh ten an khaw mamawh chi hrang hrang an sawi a, an mamawhna hmun Map a kawh pahin an mamawh chhan te an sawifiah nghal zel a, Line Department hrang hrang ten khawtlang mamawh an department kaihhnawih chu an lo chhinchhiah nghal zel a, PRA Exercise neih zawh veleh hian heng mamawh chi hrang hrangte hi a indawtin mipuite nen sawiho leh nghal a ni a, tihhlawhtlin theih chi leh theihloh chi te thliar hran niin a harsat chhante pawh inhrilhfiah nghal a ni a, vawiin sawihona atang hian Village Development Plan siamchhuah ani dawn a ni.

Vawiin PRA Exercise hi Pi Rohnuni Colney, APO, DRDA in kaihruaiin SAGY Line Department hrang hrang aiawhte, Chhiahtlang khawtlang aiawh tlawmngai pawl hrang hrang hruaitute, Village Council member te leh Bharat Nirman Volunteer (BNV) thahnem tak an tel a ni.

Source: DIPR, Serchhip