SERCHHIP-AH REPUBLIC DAY VAWI 67-NA HMAN A NI


Serchhip, 26th January, 2016 : Vawiin chawhma dar 11:00 khan DC's Playground, Khawtetlang, New Serchhipah Serchhip District Bawrhsap Dr. Lalrozama IAS hovin India Republic Day vawi 67-na urhsun taka lawm a ni a, Bawrhsap hian Republic Day lawmna hmun a thlen veleh India hnam puanzar a pawt pharh a, hemi zawh hian Republic Day Ceremonial Parade Contingent 14 (Armed Contingent-2, Unarmed Contingent-2 leh School Contingent-10) te chu endikin Parade Commander Sub-Inspector Lalengliana, 3rd Batallion M.A.P kaihhruai March Past parade contingent te chibai buk a chhanglet nghal a,10 Assam Rifles Pipe Band in India hnam hla an rem bakah March Past neih laiin rimawi an tum bawk a ni.

District Bawrhsap Dr. Lalrozama chuan Republic Day thuchah sawiin Serchhip District mipuite Republic Day chibai bukna leh duhsakna a hlan a, India ram chu hnam hrang hrang, tawng hrang hrang leh sakhaw hrang hrang bia kan nih avangin min phuar khawmtu leh zai khata min luantir tu Dan tha leh ngialnghet kan mamawh a, chumi phuhrukna tur Constitution tha leh changtlung tak kan hman tan na ni ah hian inunauna, intluktlanna leh mitin zalenna inzahsaktawn a tul zia hre thar leh ila, ram nuam leh ralmuang nei thei turin tha i thawh thar leh ang u tiin mipuite a sawm a ni.

Bawrhsap chuan Serchhip District hmasawnna atana hna a thawh chi hrang hrangte tarlangin NLUP 1st leh 2nd Phase beneficiary te hnenah tanpuina sem kim vek anih tawh thu te, 3rd leh 4th Phase beneficiary te hnenah pawh sem mek anih thu sawiin a dawng hmasa te hlawhtlinna hmuh tur a awm chho mek chu lawmawm a tih thu leh midangte pawhin tan la zel tura a beisei thu a sawi a, RKVY kaltlangin WRC-I leh II hnuaiah ram hectare 78 a zau enkawl a ni a, buh chin hlawk dan thar System of Rice Intensification pawh WRC-I hnuaiah leilet hectare 220 a zau zet ah kalpui mek a ni a ti a, Power & Electricity Department in kum 1987 a siam tawh 132kV sub-station, Bukpui chu Renovation & Modernization Scheme, NEC sponsored in Rs. nuai 457 seng a a khawl pawimawh zual te a thara thlak thu te, Zuangtui to Bukpui 132kV line siam that a disc insulator te thlak mek anih thu te, Rs. nuai 292.60 seng a 132kV line Zuangtui leh Serchhip inkar Optical Power Ground Wire a thlun zawh fel tawh thu te tarlangin, RGGVY Central Scheme hnuaiah eng luh tawhna khua tihchangtlun mek a 11kV line te thlun belh a, khaw 24 ah hna thawh zawhfel thawkhat tawh a nih thu te, Eklavya School, Kawlri tlanga power supply pekna tur pawh Rs. nuai 54.14 senga thawh zawh tawh a nihthu te tarlangin Rural Electricity Distribution Backbone (REDB) Scheme hmang a Khawlailungah 33kV sub-station thar siam tura hma lak mek anih thu leh East Lungdar 33kV sub-station pawh he Scheme hmang vek hian tih len tum a ni a, Transformer 1.6MVA dah belh tura hma lak mek anih thu te a sawi a ni.

Bawrhsap chuan kum kal ta chhung khan National Rural Drinking Water Programme hnuaiah North Mualcheng, Tlangmawi, Sailulak leh Vanchengte ah tuilakna tihfel anih thu sawiin Khawbel leh Tlungvel ah hna thawh mek a ni a ti a, District chhunga Elementary School 111 ah toilet thar sak anih thu te, Serchhip DIET sak that hna pawh kumin kum laihawla zawhfel hman anih dawn thu te a sawi a, Serchhip Tourist Lodge pawh hawn thguai anih tur thu a sawi bawk a ni.

Bawrhsap hian thu a sawi zawh hian March Past Parade contingent te hnenah hian lawmman a sem nghal a, a titha zualte chu : Pakhatna ā€“ Marian High School, Serchhip, Pahnihna ā€“ Govt. PCR High School, Serchhip, Pathumna ā€“ Little Flower Convent School, Serchhip te an ni a, parade contingent zawng zawng hnenah participation prize sem vek a ni. Republic Day pual Essay Writing Competition a ti tha te hnenah lawmman sem a ni bawk.

Republic Day pual inkhawm zawhfel anih hnu hian 166 bn. BSF ten an ralthuam mipuite hmuh turin an pho chhuak a, mipuiten an hlut hle a ni.

Republic Day pual hian tukin (January ni 26) khan JNM Hospital (Poor Fund), Salvation Army Old Age Home, Adult Rehabilitation Centre leh Shalom Special School ah te Republic Day lawmna thilpek sem a ni bawk.

Republic Day pual inkhawm zawh anih hnu hian DCā€™s at Home chu sawmbikte tan DC office tualah neih a ni.

Source: DIPR, Serchhip