SERCHHIP-AH REPUBLIC DAY VAWI 65-NA URHSUN TAKA HMAN A NI


Serchhip, 26th January 2014: Tukin dar 7:30 khan Serchhip Leisekawt Field ah Serchhip District Bawrhsap Pi Juhi Mukherjee IAS hovin India Republic Day vawi 65-na urhsun taka lawm a ni a, Republic Day lawmna inkhawm bul tan nan Bawrhsap chuan Hnam Puanzar pawt pharhin, chibai a buk a. Republic Day Ceremonial Parade Contingent 5 te a endik hnu ah; Parade Commander S.I Lalengliana kaihhruai Parade Contingent ten hnam puanzar chibai an buk chu Bawrhsap chuan chhang letin mipui te hnenah thuchah a sawi chhunzawm a, district mipui zawng zawngte chu Mizoram Sawrkar aiawhin Republic Day chibai a buk a ni.

District Bawrhsap Pi Juhi Mukherjee chuan, Mizo Tawnga thu sawiin India ram in Danpui (Constitution) mipuite tana siam, zahawm tak leh huapzo tak, tumah thleibik a neilo, Dikna, Zalenna, Intluktlanna leh In unauna ngaipawimawh em em kan nei ani tih hre renga kan ngaihpawimawh ve a ngai a ni tiin mipuite tawiawmna leh thawhpuina a sawm a ni.

Serchhip District chhunga sawrkar hmalakna hrang hrang tarlangin sawrkar Flagship Programme-NLUP hlawhtlinna pawh a lang tan ani ti a sawiin, NLUP Third Phase atan chhungkaw 2091 (Serchhip-714, Tuikum-668, Hrangturzo-709) leh Fourth Phase atan chhungkaw 1169 (Serchhip-375, Tuikum-337, Hrangturzo-457) thlan an nih thu leh, First Phase aṭanga Fourth Phase thleng Serchhip District a chhungkaw 13,732 hnenah ṭanpuina pek an ni dawn anih thu a sawi a, Serchhip District chhunga NLUP Beneficiary te zinga 68% velin hlawhtlinna hmel an hmuh tawh thu a sawi bawk.

Bawrhsap chuan naupangte dikna chanvo humhalh leh venghim turin Social Welfare Department hnuaiah District Child Protection Society din anih bakah Serchhip District chhung a Police Station tinah Special Juvenile Police Unit (SJPU) awmin naupang kumtling lo case awm reng reng chu anni hian an buaipui ṭhin bawk a ni tih thu a sawi a, Social Welfare Department kaltlangin Vocational Training Centre- Computer zirna te, Puan ṭhui zirna te leh Nutrition zirna te a awm a, thalaiten ngaihven se a duh thu sawiin, District chhung khawtinah Anganwadi Centre hawn vek a ni tawh a, kum kalta chhung khan Anganwadi Centre pasarih hawn belh niin a vaiin Centre 100 a awm ani a ti bawk.

Zirna lama hmasawnna te tarlangin Bawrhsap chuan kum kalta chhung khan RMSA hnuaiah High School pasarih sak ṭhat a nih thu a sawi a, District chhunga khawtinah High School din vek turin chak taka hma lak mek a nih thu leh. SSA Mission hnuaiah kum 2013-2014 chhung khan District chhung khawtinah Primary School leh Upper Primary School din a nih tawh thu a sawi a, kumin ah hian Midday Meal Scheme hnuaiah School choka 19 sak tur a nih thu leh a sakna tur sum pawh semchhuah vek anih tawh thu a sawi bawk. Zirlaite hriselna alo ṭhat lehzual zawkna tura Sawrkar Laipui ruahmanna “Weekly Iron Folic Supplementation Programme” pawh District chhungah chak taka kalpui niin Iron Folic Acid tablet kartin pek an nih bakah rulhlut hlo thla ruk danah pek an ni a ti bawk.

PWD ten Chhingchhip leh Hmunṭha inkar kawng a Lei an dawh leh Kawlbem leh Vaikhawtlang inkar kawnga Lei an dawh te chu kumin March thla ral hma a zawhfel theih beisei anih bakah, PMGSY Scheme kaltlangin Chhingchhip – Hmunṭha Road, Chhingchhip – Thentlang Road, Chhingchhip – Hualtu Road, Hmunṭha – Khawbel Road leh East Lungdar – Sailulak Road te hi kum 2016 January thla ral hma a laihtlang vek tum a nih thu a sawi a, RGGVY kaltlanga Serchhip District a khaw 18 a kawlphetha pek tura ruahmanna chu tihhlawhtlin mek zel a nih thu te; BPL chhungkaw 117 hnenah Electric Bill chawi ngai lovin free connection pek mek a nih thu leh kumin ṭhal lai a Zuangtui to Bukpui 132kV line hi Rs. 160 lakhs senga thuam ṭhat tum a nih thu te a sawi a ni.

Bawrhsap chuan District chhunga khaw kilkhawr leh pan harsa zual ten kumin furpui lo thlen huna buhfai leh thildangah harsatna an tawh loh nan buhfai leh eitur mamawh fur chhung tla tur chhek khawl vek tum a nih thu a sawi a, National Population Register hnuaia Biometric Enrolment chu a hlauhawm lova, misual man chhuahna kawngah te, Sawrkarin hmasawnna hna mipuite hnena a thlenna kawngah te leh thil dang tam takah a tangkai em em zawk avangin, mipuiten kan tana tha tur ani tih hria in ngaipawimawh theuh turin a ngen a. India ram bakah USA, UK, Germany, Israel leh ramdang tam takin an kalpui thu a sawi bawk.

DIET, Serchhip ah July thla atanga tan turin Pre-Service Diploma Course (kum hnih Course) leh Primary leh Middle School-a Untrained Teacher te tan In-Service Training, kum hnih Course a kalpui tan anih tur thu a sawi bawk a, Serchhip District-ah tunah hian JNNURM hnuaia IHSDP Scheme ah mirethei in 350 (zathum sawmnga) sak anih thu te,LAD hnuaia Serchhip District park, Dawngzawla siam mek chu peih tep a ni tawh thu te sawiin, Chhiatrupna laka invent kawngah District in nasa takin hma a sawn ani a ti a, National School Safety Programme (NSSP) kaltlangin District chhunga school 82 hnenah kangṭhelhna hmanrua (Fire Extinguisher) sem a nh thu te. District Disaster Management Plan siam that anih thu te, Disaster Emergency Operation Centre mumal tak Sawrkar Laipui duhdan (Central Government norms) ang taka building hran hlak sak anih theih nan hma lak mek anih thu te a sawi bawk a ni.

Parade Contingent 5 awmte zingah hian School Contingent 4 awmin a titha hengte hnenah hian Khuallian District Bawrhsap-in lawmman a sem nghal bawk : Pakhatna – Govt. J.M. High School, Pahnihna – Marian High School, Pathumna- Govt. Serchhip High School te niin, Govt. PCR High School hnenah Participation Prize hlan an ni a, Armed Contingent tel awm chhun Mizoram Police hnenah pawh participation prize hi hlan a ni a, Republic Day DC Volleyball Running Trophy a lawmman pakhatna leh pahnihna sem nghal a ni.

DC Bungalow ah chawhnu dar 3:00 atangin sawmbikte tan “DC’s At Home” buatsaih a ni bawk.

Source: DIPR, Serchhip