CHANCHINBUMITEN SERICULTURE FARM TLAWH


Dated Serchhip, the 25th November, 2016: Vawiin hian Serchhip District Journalist Association member te chuan Chhingchhip Mualpui rama Integrated Sericulture Development Project hnuaia Sericulture Cluster Farm an tlawh a, Sericulture Department hnuaia hnathawh hrang hrangte an thlir ho bawk.

District Sericulture Officer Pu V. Zothansanga chuan, Ministry of Textile, Government of India Scheme –North Eastern Region Textile Promotion Scheme (NER-TSP) hnuaia Mizoram sawrkar in Integrated Sericulture Development Project (ISDP) kum 2015 atanga a kalpui tan dan leh Serchhip District chhunga he ISDP kalpui dante chanchinbumite hmaah a sawifiah a. Serchhip District ah he Project hnuaiah hian chhungkaw 100 te chu tanpuina tha tawk tak pea Silk tharchhuak tura hmalak pui an nih mek thu a sawi. District chhungah pawh hian Circle 5 siam leh niin, Serchhip, Thenzawl, Khawlailung, Chhiahtlang leh Baktawng Circle tia then an ni a. Vawiina chanchinbumiten an tlawh Chhingchhip Cluster hi Baktawng Circle chhunga mi a ni. Tin, Cluster dangte pawhin kuminah hian test rearing an neih ve hlawm thu leh, an Mulberry hmunte pawh a that tawk thu Pu V. Zothansanga hian a sawi bawk.

Chhingchhip Mualpui Cluster ah hian ram tin 13 hmunah pangang chaw (Mulberry) chin khah vek niin chhungkaw 12 ten kumin atang khan test rearing (Vulh chhinna) an nei hlawm a. Kumina pangang vulh chhintute hian “phurawm an tih thuleh kum thar atang chuan nas zawka hmalak theih ngei an inbeisei thu” chanchinbumite hi an lo hrilh a ni. Tin, Serchhip District Sericulture Office in hma an lakpuina chu an beisei aia nasa a nih thu leh, hneh taka an vil reng avanga an lawmzia an lo sawi bawk.

Integrated Sericulture Development Project hnuaiah hian, beneficiary tura thlante chu Thingtheihmu huan siamna tanpuina te, Ruahtui dahkhawlna te, Huan hungna te, Thlam sakna te, Pangang vulhna in te, Pangang vulhna hmanrua mamawh tinreng te, Tuilakna te, Solar light thlengin pek vek an ni a. Training chi hrang hrang bakah State chhunga Pangang vulhtu hlawhtlingte tlawhpui thlenga hma lakpui an ni. Tin, ISDP bakah hian NLUP atangin chhungkaw engemawzat pangang vulh tanpuina kalpui a ni mek a, tunah hian ruahmanna dang Integrated Muga Silk Development Project te, Muga Project under Green India te leh Eri Project te awm mek bawkin Eri project phei hi chu bul tan theih tep a ni tawh nghe nghe a ni.

Serchhip District MJA President Pu C. Lalhminghlua, Editor, Laisuih chuan, Sericulture Department in an hmalakna chanchinbumite hmaa an pholang ngam chu lawmawm a tih thu leh, District Sericulture Office thawktuten theihtawp chhuahin hna an thawk ngei a ni tih mita an hmu ve thei chu lawmawm a tih thu a sawi a. Department dangte pawhin hetianga chanchinbumite remchang siam sak duhna thinlung nei chho zel se a duh thu a sawi a ni. Loneiute tan hlawhtlinna ngelnghet a chhuah ngei a rin thu a sawi bawk.

Source: DIPR, Serchhip