SERCHHIP-AH “ROAD SAFETY WEEK 2014” HAWN A NI


Serchhip, 25th November, 2014: Tukin dar 8:00 khan Zoram Drivers’ Union Sub-Headquarters, Serchhip bul tumin Serchhip Bazarah “Road Safety Week” (Fimkhurna Hapta) Vawi 34-na hawnna inkhawm neih a ni a, District Bawrhsap Pi Juhi Mukherjee, IAS chuan khuallian niin he Fimkhurna Hapta hi a hawng a ni.

Road Safety Week Road Safety Rules an hriatchian a an zawm a pawimawh hle a ni a ti a, Maxicab, taxi, Auto Rickshaw leh Town Bus khalhtu te chu an motor dinhmun a tha a ni tih finfiah reng thin tur leh a phurh theih zat bituk aia tam phurlo tur te, motor khalh laia zial zu lo tur leh mobile phone hmanglo tur in a chah a, MLTP Act hlih anih tak avanga inthlahdah mai lo tur leh a hma aia fimkhur zawk turin lirthei khalh thin zawng zawng te a ngen a, Driver te chu mipuite rawngbawlsaktu pawimawh tak an ni tih sawiin an chungah lawmthu sawina leh duhsakna a hlan nghal bawk a ni.

Serchhip Superintendent of Police Pu Romil Baaniya, IPS pawhin thusawiin India ram hmun dang nen khaikhin chuan Mizoramah Road Safety Rules kan zawm tha hle a a hriat thu sawiin hmasawnna tur erawh a la tam a ni a ti a, zinkawnga motor chhia a awmin tuman an kalsan ngailoh bakah siamthat anih hma chuan kan innghak thinte hi hmundangah ka hmu ngailo a ni tiin Driverte tlawmngaihna a fak a, ding hmanlo an awm pawhin chanchin an inngaihven tal thin te hi a mawi em em a ni a ti bawk. Pu Romila chuan motor khalh paha zialzuk hi Dan in a khap thil anih vangin ZDU hruaitute pawhin an member te zirtir uar deuh se a duh thu a sawi a, zuri chunga chak tak taka motor khalh hi driver tan mai bakah midang tan a hlauhawm avangin mahni inhriatchiana rui chunga khalh loh ngam a pawimawh a ni a ti a, Traffic Police an neih tlem ngaihtuahin an thawkrimin an thawktha hle ani tiin Traffic Police te a fak a, an hnathawh kawngah mipuiten kan tawiawm that a an thu kan ngaihpawimawhsak thiam phei chuan awlsam takin harsatna tam tak kan pumpelh thei dawn a ni a ti bawk.

Tukin Road Safety Week 2014 (25th – 29th November) hawn inkhawm hi Pu T.Rosiama, President, ZDU Sub-Headquarters, Serchhip-in a kaihruai a, Pu Sanghnuna Pachuau DTO, Serchhip leh Pu Andrew H. Lalremruata MIS, DIPRO, Serchhip ten an telpui a ni.

Source: DIPR, Serchhip