SERCHHIPDISTRICT-AH PHAL LOHNA HMUNA MEI ZU AN AWMLOH NAN TAN LAK MEK A NI


Serchhip, 25th October, 2014: Mizoram State Tobacco Control Society (MSTCS) hmalakna in nimin tlai dar 3:00 khan Serchhip DC's Meeting Room-ah Serchhip District chhunga phallohna hmuna mei zu an awm tawh lohna tura hmalak dan tur sawiho a ni a.

He sawihona ah hian Serchhipa sorkar pisa hrang hrang hotute leh Serchhip khawpui huamchhunga Village Council aiawh te an tel a; meizuk khapna dan COTPA chungchang zirtir an ni a. He hun hmanpuitu Serchhip District Addl DC Pu VL Remliana, MCS chuan vaihlo kaihhnawih thil hman khapna Dan (COTPA-2003) chu hriselna vawnhimna tura duan a ni a, dan bawhchhiate pawisa inchawitir ringawt chu an duh ber a ni lova, mipuite pawhin thu awih taka he dan hi kan zawm a ngai a ni a ti.

He hun hmannaah hian Mizoram State Tobacco Control Society Serchhip District Coordinator Pi Vanlalzari'n zirtirna a pe a. Global Adult Tobacco Survey (GATS) Report ah India rama phal lohna hmuna meizu 37 % a nih laiin Mizoram chu sang berin 67 % lai a ni a, nakkumah GATS report hi a tlak hniama dinhmun zahthlak taka kan awm tawh loh nan leh Serchhip chu meizu tlemna hmun a siam a nih theih nana theihtawpa tan lak a tul thu leh report-a min pawt hniam theitu apiang chak taka bawhzui turin Department hrang hrang aiawh te, Zirna In sanga Principal leh Headmaster te leh VC kalkhawmte te chahin, heta kalte hi an thuneihna hmunah theuhah COTPA lekkawh tur an ni tih hrilhin, an hnena complaints lut ah hma an la duh lo a nih chuan anmahni pawh hremna pek theih an nih thu a hrilh bawk a. Phalna lohna hmuna meizu an man te hnena pek tur Challan (receipt) pawh an kutah hian hlan theuh a ni.

Source: DIPR, Serchhip