MKVIB CHAIRMAN PU K.LIANZUALA, MLA IN GOVT. CHHIAHTLANG HIGH SCHOOL RMSA BUILDING THAR A HAWNG


Serchhip, the 25th September, 2013: Cheng Nuaih 32 chuanga sak Govt. Chhiahtlang High School RMSA Strengthening Building chu Pu K.Lianzuala, bialtu MLA leh MKVIB Chairman ni bawk chuan vawiin chawhma dar 11:00 khan Chhiahtlangah a hawng.

Vawiina RMSA Building thar hawnna inkhawmah hian Pu K. Lianzuala chuan thusawiin hun rei tak atanga an nghahhlelh tawh tihpuitlina a awm ta chu a lawmawm takzet a ni a ti a, Govt. Chhiahtlang High School in HSLC exam result ropui tak tak a nei thin chu zirtirtu mahni hna a tui leh lungawi, thahnemngai tak tak te vang leh zirlai naupang, nu leh pa te leh khawtlang tanrualna vang a ni a ti a, zirlaite chu academic result tha ringawt duh tawk lova chhawr tlak thiamna paw chhuak tura inbuatsaih tur leh rilru siam turin a chah a ni. Zirna lamah Tuikkum Bialin hma a sawn dan tarlangin RMSA hnuaiah ringawt pawh tun hnaiah School building panga – Chhingchhip, Baktawng, Tlungvel, Thinglian leh Chhiahtlang ah hawn a ni ta a; Lungpho leh Khumtungah pawh hawn theih tep a ni tawh a, hei bakah hian Sialhau leh Khawbelah pawh RMSA building hi sak tura engkim peihfel anih tawh thu leh hna tan thuai anih tur thu a sawi bawk a ni.

Pu K.Lianzuala chuan Mizoram sawrkarin zirna a ngaihpawimawh avangin tunlai khawvel mil zela zirlaiten thiamna an neih theih nan hma a la a, Education Reforms Commission pawh India rama siam hmasa ber leh siam ngam awmchhun kan ni tiin zirna kawnga hmasawnna tur anih chuan huaisen takin Mizoram Sawrkar chuan ke a pen zel dawn a ni a ti bawk. UPA Chairman Pi Sonia Gandhi-in Chhingchhip a Sainik School tur lungphum a phum chu Bial chhung leh Mizoram tana rotling anih thu sawiin Pu K.Lianzuala chuan zirlaite leh thalaite hmalam huna beiseina nung leh phurna pe tu tur a ni a ti a, Sainik School chu kum 2015 a peihfel hman tura chak taka hma lak mek anih thu sawiin Zangnadawmna phut miah lova ram petu Chhingchhip khua a chhungkaw 40 lai leh Chhingchhip khawtlang chu entawntlak tak, ram leh hnam hmangaihna rilru tak tak pu an ni a ti bawk.

Chhiahtlang khawchhung hmasawnna tur pawhin hma nasa taka lak anih thu sawiin September ni 22, 2013 atang khan Chhiahtlang khawchhungah Police Beat Post dah thar a ni a ti a, Chhiahtlangah damdawiin khum 10 awmna pawh dah tura ruahmanna kalpui mek anih thu te, Mulen tlanga Polytechnic dah tura ruahman mek pawh hna tan thuai anih dawn thu te leh Internal Link road chi hrang hrang siam anih thu te sawilangin Pu K.Lianzuala chuan Tuikum Bial chu Bial mawngping, khaw mawngping an ni tawh bik lo a ni a ti bawk.

RMSA Building thar hawn tak hi RMSA Strengthening Work hnuai ah Rs. 32,22,500/- senga sak a ni a, a sa tu contractor hi Pu R.Vanlalvena, Bethlehem Veng, Aizawl a ni. School Building sakna bakah hian Electrification atan Rs. 1,00,000/- hmuh a ni a, Furniture Fund atan Rs. 2,00,000/- leh Science Laboratory Equipment leina turin Rs. 1,00,000/- hmuh a ni bawk.

Govt. Chhiahtlang High School RMSA Building hi kum 2009-10 a fund hmuh tan anih veleh sak tan nghal a ni a, chhawng hnih a sak niin Class Room pahnih, Library pakhat, Computer Room pakhat, Art & Craft Room pakhat leh Science Laboratory pakhat a awm a, mipa leh hmeichhe tan inthiarna hran ve ve tha taka sak anih bakah tuithianghlim in tur leh dahna tur siam a ni bawk.

Govt. Chhiahtlang High School hi April 1, 1968 a din a ni a, 1970 ah Aided ah hlan kai niin , 1972 ah Deficit a ni a, December 1, 1991 ah Provincialised a ni. Tunah hian Headmistress Pi K.Zoramchhani hovin zirtirtu 12 an awm mek a, kum 2013-14 academic session ah hian Zirlai 109, Class IX-64 (mipa-33, hmeichhia-31) leh Class X-45 (mipa-19, hmeichhia-26) an awm a, kum 2013 HSLC Examah khan Zirlai Exam 21 awmin Distinction ah 3, First Division ah 11, Second Division ah 7 an passed a, pass percentage hi 100% a ni.

Vawiin a Govt. Chhiahtlang High School RMSA Building thar hawnna inkhawm hi Pu C. Zolawma, DPCD. RMSA, Serchhip District-in a kaihruai a, Pi K. Zoramchhani, Headmmistress, Govt. Chhiahtlang High School in report a pe a, Chhiahtlanga sawrkar hnathawk te leh khawtlang hruaitute an kal tha hle a ni.

Source: DIPR, Serchhip