SERCHHIP-AH PARA-LEGAL VOLUNTEERS TRAINING NEIH A NI


Serchhip: 25th June, 2012: Serchhip District Legal Services Authority buatsaih nihnih awh tur Para-legal Volunteers Training chu vawiin chawhma dar 11:00 khan Serchhip DC Meeting Room-ah tan a ni a, Pu T.Lalhmachhuana Judicial Magistrate leh Pu H.Lalrinpuia, MCS Sub-Deputy Commissioner te chu resource person atan hman niin, Serchhip District chhunga Para Legal Volunteers (Legal Services Volunteers) lak thar mi 30 te hnenah an hnathawh tur kalphung leh an hriattur pawimawh zualte zirtirna an pe a ni.

Pu T.Lalhmachhuana, Judicial Magistrate chuan Para Legal Volunteers te pawimawh zia sawiin mipui ten sawrkar dan leh hrai kan hriatchian loh em avangin kan dikna leh chanvo te humhalh dan tur kan hre thin lova, a tuartu chu mipuite bawk an nih avangin hetiang kawngah hian mipuite zirtir tur leh kalkawng kawhhmuh turin an Para Legal Volunteers te tangkai a ni a ti a, Judiciary leh mipuite inkara palai hna thawk tu an nih avangin an hna chu uluk taka thawh a ngaih thu leh dikna leh rinawmna humhalh tlat tu thinlung pu chunga an hna thawk turin a chah a, an hna an thawhna kawnga harsatna leh tanpui an ngaihna apiangah anmahni pui tura a in kau reng thu a sawi bawk.

Pu H.Lalrinpuia, SDC pawhin Para Legal Volunteers' Scheme chungchang sawiin Volunteer nih theih dan kawng leh an tih tur leh tih loh tur te zirtirna a pe a, an hna pawimawhna hria a rawn tlak leh pan tlak ni tura an hriatna te tipung zel tur leh dik tak leh thahnemngai taka mipuite tana thawk turin volunteer te chu a sawm nghal bawk a ni.

Para-Legal Volunteers hi National Legal Services Authority in mipui vantlang ten awlsam taka sawrkar an dawr zung zung theihna tur atana hmanraw tangkai tak ni tura a din a ni a, District Legal Services Authority ruahmanna in hmun remchang leh mipuite tana pan awlsamna laiah Legal Aids Clinic hawngin volunteer te hian an enkawl ang a, khua leh tui tupawhin sawrkar an dawrna kawngah tanpui turin an pan thei dawn a ni. police station a FIR thehluh chungchangah te, application form fill up leh ziah chungchangah te, sawrkar scheme hrang hrang hnuaia dilna siam chungchangah leh thil dang tamtakah heng Para-Legal Volunteers te hian tanpui ngai te a thlawnin an tanpui thin dawn a ni.

Para-Legal Volunteers te hi kum khat chhung atana lak an ni a, an thawh that dan azirin rawih nawn leh theih an ni, Serchhip atan bik hian mi 30 lak an ni a, Legal Aids Clinic hi DC Office ah leh New Serchhip ah pakhat ve ve leh Serchhip ah pahnih dah phawt tura ruahmanna siam a ni a, nilaini leh zirtawpni ah te dawr theih an ni ang a, mamawh dan azirin hmun dangah pawh hawn belh leh zel tura ruahmanna siam a ni.

Vawiin training hi Pu Andrew H.Lalremruata, DIPRO in a kaihruai a, training hun pangngai hman zawh a nih hnu ah zawhna leh chhanna hun hman niin trainee te hnenah hian TA/DA sem a ni bawk.



Source: DIPR, Serchhip