SERCHHIP-AH "WORLD MALARIA DAY" HMANG


Serchhip, 25th April, 2016 : Vawiin hi khawvel pum huap "World Malaria Day" a ni a, hemi denchhen hian District Vector Borne Disease Control Programme (DVBDCP), Serchhip buatsaihin Chief Medical Officer's Conference Hall ah inkhawm buatsaih a ni a, District Bawrhsap Dr. Lalrozama, IAS chuan khuallian niin a hmanpui a, Government Serchhip College zirlaite leh thuthar thehdarhtute bakah JN Hospital Serchhip-a thawktu daktawr te an tel a ni.

Khuallian chuan Malaria natna hi kum tam tak kal ta atanga kan hmelhriat tawh tun thlenga kan la buaipui em em anih avangin ralpui beih a kan beih a ngai hle a, mipuite hnenah nasa lehzuala Malaria laka inven dan kan inzirtir a pawimawh a ni a ti a, damdawiina thawktute an indaihloh avangin harsatna tak tak mipui zirtir kawngah kan tawk a, hetih laia zirlai lehkhathiam rualte an rawn che chhuak chu lawmawm a tih thu a sawi a, zirlai lehkhathiam rual ten an vei a thahnem an ngaih pui phawt chuan midangte pawhin nasa lehzualin an ngaihpawimawh a rin thu a sawi bawk. Bawrhsap chuan a pawi hnu a inenkawl ai chuan lo inven lawk a tha a, hun leh tha bakah sum leh pai nasa takin a um tel thei bawk dawn a ni a ti a, thosi inthlahpun theihna tui tling tih bo te, thosilen tha taka zar leh DDT fimkhur taka kah tir te a pawimawh hle a ni a ti bawk. Bawrhsap chuan Mizoram pum ah kum 2014-2015 khan Malaria vangin mi 31 an boral laiin kum 2015-2016 ah erawh mi 21 an boral a, zawi zawiin hma kan sawn a, hei hi thil chhinchhiah tlak anih bakah Malaria kan dona kawngah pawh tan min lak thar tir tu ni se, hneh theihloh a nilo tih hre thar leh ang u tiin mipuite leh damdawiin a thawktute a chah a, theihtawp chhuah a Malaria umbo tura hma lak a tul thu sawiin a theih ang angin ani pawhin tan a lak chhunzawm zel tur thu a sawi bawk.

Bawrhsap hian "World Malaria Day, 2016" denchhena Govenment Serchhip College zirlaite puala Poster Writing Competition buatsaih a titha te hnenah lawmman a sem nghal a, lawmman dawngtute chu :

Pakhatna : Lalduhzuala, 4th Semester, B.A (Citation + Rs. 3000/-)
Pahnihna : Lalrinzuala Hnamte, 4th Semester, B.Sc (Citation + Rs. 2000/-)
Pathumna : Albert Lalhmingthanga, 2nd Semester, B.Sc (Citation + Rs. 1000/-)
Government Serchhip College zirlaite hian vawiin tlai khan Serchhip khawpui chhung hmun hrang hrangah Malaria do let tura mipuite zirtirna atan poster engemawzat an tar nghal a ni.

Kumin "World Malaria Day" thupui atan "End Malaria For Good" (Malaria Nuaichimit Hlen Rawh) tih chu hman a ni a, kum 2015 (January-December) chhung khan Serchhip District ah thisen 16,004 test niin Malaria hrik pai 163 hmuhchhuah an ni a, heng zinga 122 hi Malaria PF niin 41 chu Malaria PV an ni a, Malaria hrik vanga nunna chan 2 an awm bawk. Kumin (2016) January atanga March thleng khan thisen 3610 endik tawh niin Malaria hrik pai 4 hmuhchhuah an ni tawh a, an vai hian Malaria PV vek niin Malaria vanga nunna chan an la awmlo a ni.

Vawiin "World Malaria Day" pual inkhawm hi Dr. Laldawngliana Sailo, CMO, Serchhip District in a kaihruai a, Pi Lalmalsawmi, VBD Consultant in Malaria do kawnga an hmalakna report a pe a, Serchhip District chhunga PHC leh CHC zawng zawngah vawiin hian "World Malaria Day" pual inkhawm buatsaih vek a ni.

Source: DIPR, Serchhip