AH& VETY. DEPARTMENT-IN CHHIAHTLANG-AH FREE ANIMAL HEALTH CAMP BUATSAIH


Serchhip, 25th February, 2016 : Vawiin khan AH&Vety Department, Serchhip District buatsaihin Chhiahtlang Community Centre-ah Awareness Campaign – cum - Animal Health Camp buatsaih a ni a, Rajya Sabha MP Pu Ronald Sapa Tlau-in SAGY hnuaia Chhiahtlang khua model village a siam tura a thlan behchhana Village Development Plan siam bawhzui a he hun hi buatsaih a ni.

Awareness Campaign – cum - Animal Health Camp hi hun hnih ah then niin chawhma lamah ran enkawl dan chungchang inzirtirna hun (awareness campaign) hman a ni a; he hun hi Dr. Lalnghinglova, DVO, Serchhip District chuan kaihruaiin Pu C.R.Dothanga, Village Council President, Chhiahtlang-in khawtlang aiawhin thu a sawi a, Dr. Lalmuanpuia Samte,V.O., Thenzawl-in Ar vulh dan zirtirna a pe a, Dr. Biaklianzuali, V.O., Chhingchhip in Vawk vulh leh enkawl dan zirtirna a pe a, Dr. Lalsanglien Ralsun, V.O., Serchhip hnen atangin Bawng vulh dan tur dik zirtirna ngaihthlak niin hriatthiamloh leh hriatchian duh te inzawhfiahna hman a ni a, mihring ran vulh ten natna chin hrang hrang an kai theih dan leh hri leng laka in ven dan tur te leh ran damlo enkawl dan tur te chipchiar taka zirho a ni bawk.

Chawhnu lamah a thlawna ran entirna hun buatsaih niin ran vulhte ran hridanna a chiu (mass vaccination) beihpui thlak nghal a ni a, Ui a hri danna ARV (Anti-Rabbies Vaccine)hu Ui 81 pek an ni a, vawk pul hri danna SFV(Swine Flu Vaccine) hi vawk 98 pek niin Vawk 3 zai anih bakah Ar 8 chiu a ni bawk. Khaw chhunga vawk vulh te pawh vawk inah kalchilh in hri danna pek an nih bakah ran enkawl dan inziahna bu a thlawnin sem a ni bawk.

Khawtlang mipuiin he hun hi an hlut hle a, hetiang hun buatsaihtu AH&Vety Department, Serchhip District chungah Chhiahtlang khawtlang hruaitute an lawm hle a ni.

AH&Vety Department hian January ni 14, 2015 khan Chhiahtlangah hian Free Animal Health Camp hi an lo buatsaih tawh bawk a ni.

Source: DIPR, Serchhip