SERCHHIP BAWRHSAP IN SERCHHIP DISTRICT MJA ANNUAL GENERAL CONFERENCE VAWI 9-NA HMANPUI


Serchhip, 25th January, 2016 : Vawiin nileng khan I&PR Conference Hall, Serchhip-ah Serchhip District MJA Annual General Conference Vawi 9-na neih a ni a, Serchhip District Bawrhsap Dr. Lalrozama, IAS chuan khuallian niin a hmanpui a, MJA General Headquarters atangin an General Secretary Pu Sangzuala Hmar leh Pu Lal Rinmawia, Executive Member ten an hmanpui.

Vawiina khuallian Serchhip District Bawrhsap Dr. Lalrozama, IAS chuan Serchhip District MJA chu duhsakna hlanin an hna pawimawhzia hre thar leh turin a chah a, tunlaiah internet atang leh social media hrang hrang kaltlangin thuthar lakkhawm a awlsam tawh em em a, information in ang thup thup chanchinbu hrang hranga a lan chang a awm thin a, hetiang news item ah hian midang neih ve loh chhiar belh tur a awm thin hian a belhtu journalist te thiamna leh taimakna a lang chhuak thin a ni a ti a, thuthar an lakkhawm in thu tluang pangngai bak hriat belh neih a hlut zia a sawi lang a, thu chhuah tur him leh him lo thliar hran a pawimawhzia sawiin thil a nihna ang ngau ngau a tarlan anih pawhin mipui zirtir thei thil telh belh hram thin a pawimawh a ni a ti bawk. Bawrhsap chuan mipui rawngbawltu hna hi thil namai a ni lova, chanchinbumi nih ngat phei chu huaisen ngai tak anih avangin a tui chilh tak tak tan lo chuan beidawnna tur a tam hle a, sawichhiatna leh fakna a inkalthelh reng avangin mahni inrintawkna nen thawh a ngai a ni a ti bawk. Serchhip District hmasawnna atana theihtawp chhuah puiah MJA te sawmin thawhhona tha tak an neih chhunzawm zel a beisei thu a sawi bawk a ni.

Vawiin Serchhip District MJA Annual General Conference hi chhawng thuma then a ni a, Chawhma inkhawm hi Pu Lalremruata Ralte, Vice-President, MJA Serchhip District-in a kaihruai a, Presidential Speech Pu Kapliana Pachuau hnen atang ngaihthlak niin Pu C. Ramengmawia hnen atangin General Secretary Report ngaihthlak ani a, Pu C.Lalhminghlua, Treasurer hnen atangin financial report ngaihthlak a ni bawk. Tunah hian Serchhip District-ah MJA member 17 an awm mek a ni.

Chawhnu lamah kum Rorel inkhawm neih niin Serchhip District MJA hnathawh dan thlirletna leh hmalam hun atana ruahmanna chi hrang hrang sawiho a ni a, hemi hnu hian 2016-2018 chhunga an hruaitu tur an thlanga, he inthlanna hi returning officer Pu Andrew H. Lalremruata, MIS, DIPRO Serchhip leh MJA General Headquarters kaihhruaina a neih niin heng a hnuai mite hi an hruaitu thlan tharte chu an ni.

President : C.Lalhminghlua, Editor, Laisuih Daily Newspaper
Vice President : C. Ramengmawia, Editor, Lamkal Daily Newspaper
Treasurer : Lalremruata Ralte, Editor, Ramlai Arsi Daily Newspaper

Executive Members :
1) H. Lalbiakzauvi, Editor, Serkhawpui Daily Newspaper
2) Zonunsanga Kawlni, Editor, Lenkawl Daily Newspaper
3) Thuamliana, News Editor, Ramlai Arsi Daily Newspaper
4) R. Lalmuansanga, News Editor, Serkhawpui Daily Newspaper
5) C. Lalrochhuanga, Editor, Zothlifim Daily Newspaper

Ex-Officio Member:Kapliana Pachuau, Editor, Serchhip Times Daily Newspaper

Source: DIPR, Serchhip