SERCHHIP-AH NATIONAL VOTERS’ DAY VAWI 6-NA HMAN A NI


Serchhip, 25th January, 2016 : Vawiin chawhma dar 10:00 khan Serchhip DC Conference Hall-ah National Voters’ Day vawi 6-na hman a ni a, Serchhip District Election Officer, Bawrhsap ni bawk Dr.Lalrozama, IAS chuan khuallian niin a hmanpui a ni.

National Voters’ Day puala mipui kalkhawmte hma ah thu sawiin inthlang ram kan ni a; ram hruaitu kan thlanchhuah te azirin kan ram hi a thangin a thang lo thei a, chuvang chuan voters te kan pawimawh em em a, ram leh hnam hmasawnna hnuk kan ni tih kan inhriatchian thar fo a tul a ni a ti a, a bik takin electoral roll a tel thar te chu an chanvo humhalh kawngah rinawm a pawimawhzia hre turin a duh thu a sawi a ni. Bawrhsap chuan Serchhip District chu inthlan chungchangah an hming a tha hle a, hei hi Election Official te, NGO leh thuthar thehdarhtute bakah mipui te vang liau liau ani a ti a, kum 2014 MP Election a Mizoram chhunga vote tlak thatna ber District an ni te, 2013 MLA Election ah Serchhip District chhunga Hrangturzo Assembly Constituency chu MIzorama Constituency vote tlak thatna ber an ni te chu thil ropui tak leh entawntlak a ni a, heng avanga hmingthatna kan neih hi kan phu ngeia ni tih tilang turin Inthlanpui lo awm lehzel turah tha thlah lova kan tanrual a ngai a ni a ti bawk. Bawrhsap chuan therhlo, thlemna leh vauna avanga an vote hlu tak hralh lo tura chahin an dikna chanvo humhalh ngei thin turin a fuih a, NGO leh thuthar thehdarhtuten an tawiawm thatna leh thahnemngaihpuina ah lawmthu sawiin thawhhona tha neih chhunzawm zel puiah a sawm bawk a ni.

Vawiin inkhawmah hian kum kalta chhunga Serchhip District a Assembly Constituency pathuma BLO hna thawk tha ber thlanchhuah te hnenah lawmman Citation leh Tangkafai Rs. 3000/- theuh hlan an ni a, chung BLO tha thlanchhuah te chu :

26-Serchhip(ST) A/C : C. Hmingthanmawia, BLO, 26/3, Thenzawl-III Polling Station (Teacher,Govt. Standard Middle School, Thenzawl)

27-Tuikum (ST) A/C : Hmingtharchuanga, BLO, 27/8, Baktawng-III Polling Station (Teacher,Chhuanthar Middle School, Baktawng)

28-Hrangturzo (ST) A/C :Lalsangliana, BLO, 28/9, Khawlailung-II Polling Station (Teacher,Govt. Middle School-I, Khawlailung)

BLO tha lawmman leh Polling Station titha lawmman hi District Election Officer Dr. Lalrozama, IAS in a hlan a ni.

Pu Lalhmansanga, MCS, Election Officer pawhin inlawmna thu sawi pahin National Voters’ Day hman anih chhan leh a awmzia te sawifiahna hun a hmang a, Electoral Roll a awm chu vote thlak thei an ni ta tih entirna ani satliah mai lova, Dan hmangin India ram rorelna leh inrelbawlna ah an tel ve tawh tihna ani tih hre turin leh rilru diktak pu chunga an mawhphurhna te hlen ngei turin a chah a ni.

Vawiin inkhawm hi Pu V.L.Remliana, MCS, Addl. D.C. Serchhip-in a kaihruai a, Electoral Roll a tel thar te zing ami Nl. Lalruatfeli, Serchhip-VIII kaihhruaiin National Voters’ Day thutiam chham rual a ni a, Pu L.Rinliana, MCS, ERO, Tuikum (ST) A/C , Pu Vanlalrova, MCS, AERO, Tuikum (ST) A/C leh Pi B.Malsawmtluangi, MCS, AERO, Serchhip (ST) A/C ten Voters Electoral Roll a thun thar te hnenah EPIC an sem a ni.

National Voters’ Day hi January ni 25 a hman tur a ni a, Mizoramah erawh he ni hi Pathianni anih vangin Election Commission of India phalna in vawiin hian hman a ni.

Source: DIPR, Serchhip