MzSRLM HNUAIA DISTRICT LEVEL COMMUNITY FACILITATORS TRAINING HAWNG


Dated Serchhip, the 24th October, 2016: Vawiin chawhma dar 11 khan ni 5 chhung awh tur, Mizoram State Rural Livelihood Mission hnuaia District Level Community Facilitators Training chu Dr. Lalrozama, IAS, District Bawrhsap in BNRGSK Hall, Serchhip ah a hawng.

Bawrhsap chuan thu sawiin, Sawrkar hian Chhungkua a ngai pawimawh hle a, chhungkuaah chuan nu dinhmun a ngai pawimawh leh em em a ni. Nu in chhungkaw tan a theihna zawng zawng a hlan thin a, hna thawka a chhuah bo chuan inchhung leh a fate enkawltu tur an awm lova, harsatna a thleng thin. Chu harsatna chu engtia sutkian tur nge ni ang tih ngaihtuah chungin, nu in hna thawk chunga chhungkaw enkawl hna a thawh kawp theihnan Self Help Group ruahman hi a ruahman ta a, a lawmawm hle a ni. Nu leh Pa in chhungkaw chawm nan hna an thawk a, chumi piahah chuan an fate mi puitling ni tura an chherchhuah hi he ruahmanna hian a tum lian tak a ni, a ti. Naupangte hriselna leh an rilru put hmang siam puitling turin nu an pawimawh ber a ni tih hre reng turin Training tura kalkhawm te chu a chah a ni. Bawrhsap hian Serchhip RD Block huam chhung khaw 4-a Village Organisation 7 leh E. Lungdar RD Block chung khaw 9-a Village Organisation 9 te hman turin Computer Set a hlan nghal a ni.

Training hawnna inkhawm hi Pi Rohnuni Colney, District Mission Manager, DRDA in a kaihruai a. Pu C.H. Thangkhuma, State Mission Manager chuan inlawmna thu sawiin, training hi State Level atang maia ruahman nilovin, Prime Minister Office atanga ruahmanna lo kal a ni a, State Levelah Training buatsaih ni tawhin District Level-ah hian khaw tina Self Help Group te hnena zirtirna pe chhawng leh tu tur, Village Organisation 61 atangin training tur hian koh an nih thu a sawi.

Serchhip District chhungah hian Hmeichhiate hmasawnna tur leh an tan eizawnna ngelnghet siampui turin Self Help Group 452 an awm mek a, khaw tina Self Help Group te an inthlunkhawmna turin Village Organisation din pui vek an ni tawh a, Office pawh changtlung taka dinpui an ni tawh hlawm a ni.

Source: DIPR, Serchhip