SERCHHIP-AH INDEPENDENCE DAY VAWI 68-NA HMAN DAN TUR REL


Serchhip, 24th July, 2014: Vawiin chawhnu dar 1:00 khan Serchhip DC’s Meeting Hall-ah kumin August ni 15-a Independence Day vawi 68-na Serchhip a lawm dan tur rel a ni a. Serchhip a Sawrkar Pisa hrang hrang hotute, Village Council leh tlawmngai pawl hrang hrang aiawhte an tel tha hle a ni.

Meeting hi District Bawrhsap Pi Juhi Mukherjee, IAS, chuan kaihruaiin kumin Independence Day lawmna inkhawm hi Khawtetlang khelmual, New Serchhip ah August ni 15, zing dar 10:30 ah tan tura ruahman a ni a, khuallian chu Sawrkarin a ruat tur anih avangin sawrkar ruahman dan ngaihchan tur a ni ang, kum danga tih thin ang bawkin Independence Day Parade neih leh tur a ni bawk a, hetah hian Armed Contingent 2 (Mizoram Police & 14 Assam Rifles) leh Un-armed/School Contingent engemawzat tel thei tura beisei an ni a. Parade hi endiktu tur ruat a ni ang a; a ti thate hnenah lawmman sem tur a ni ang.

Meeting-ah hian Independence Day lawmna atana thil pawimawh chi hrang hrang– Electric Power Supply, tui thianghlim in tur, First Aid, Pavillion siam leh chei dan tur te, Field chei dan tur te leh thil tul dang te uluk taka ruahman niin, mawhphurhna Department hrang hrang te leh tlawmngai pawl hrang hrangte hnenah sem rual a ni a, Independence Day zing karah Serchhip khawpui huam chhunga Home leh Institution hrang hrang thlan chhuah bikah te Independence Day lawmna thilpek sem a ni bawk ang.

Independence Day ah hian chhun dar 12:00 ah D.C Bungalow,Khawtetlangah ‘D.C’s at Home’ neih tura ruahman a ni.

Bawrhsap chuan sawrkar hnathawkte chu he ni hi ngaipawimawh tura chahin, Department hotute zingah Independence Day lawmna a kallote chu explanation call anih tur thu leh an Department hotulu te pawh hriattir annih tur thu a sawi a, chutiang bawkin an hnuaia thawkte chungah pawh hmala theuh turin a hrilh bawk a ni. India hnam puanzar (National Flag) chu Department tin ten a tarna hmun turah zing ni chhuah rual atar vek tur leh ni tlak hma a seng leh vek turin a chah a, Independence Day lawmna atana Department hrang hrangte inbuatsaihna hi August ni 8, 2014, chawhma dar 11:00 ah thlir ho leh tura ruahmanna siam nghal a ni bawk.

Source: DIPR, Serchhip