SERCHHIP-AH HSLC EXAMINATION 2016 A TITHA TE CHAWIMAWI


Serchhip, 24th May, 2016 : Vawiin chawhma dar 11 khan MZP Hqrs. Serchhip huaihawtin HSLC Examination 2016-a Serchhip khawpui huam chhunga High School hrang hrang atanga Distinction-a pass te chawimawina hun buatsaih a ni a, he hun hi District Bawrhsap, Dr. Lalrozama, IAS chuan khuallian niin a hmanpui a, Pu K.Sapdanga, Editor, Vanglaini Daily newspaper chu khualzahawm a ni.

Zirlai titha chawimawina inkhawm hi Pu T.Biakchamliana, President, MZP Hqrs., Serchhip chuan a kaihruai a, khuallian District bawrhsap chuan thusawiin, zirlaite chu an lehkha zir chu hlawkpui nana hman tum turin a chah a, lehkha zir hlawkpui lo an awm thin ni a a hriat thu sawiin, lehkha thiam inti zingah hnathawh tur nei lo an awm thin tih a sawi a, lehkhathiam inti hnathawh neih loh vanga lungawi lo leh tur si chuan lehkha zir lo mai rawh se, nun chhiatna bul a ni a ti. District Bawrhsap chuan text book hi a pawimawh a, mahse text book ringawt hian inelna tak tak ah min pui tam lo hle a, chuvangin text book pawn lam pawh nasa taka kan zir nasat a ngai a ni a ti a, kan hun te hi minute 1 kan hman inchher chhuanin a siam a ni a, chuvangin minute tin leh nitina kan thutlukna siam dan hi a pawimawh ani tiin, kan thil hmuh leh hriat te hlawkpuina atana hmang thei tura chhinchhiah zel leh chiang zawka hriat tum zel a tul a ni a ti a, hei bakah hian tawng ngaih pawimawh tul a tih thu sawiin, English mai bakah Hindi ngaih pawimawh a tul a, hlawhtlinna atan chuan Pathian tih a pawimawh hmasa ber ani a ti bawk.

Khualzahawm, Pu K.Sapdanga chuan hlawhtlinna hi sikul emaw, course lak fuh emaw-a innghat a ni lova, zirlaite a innghat a ni a ti a, lehkha zir chhuah hnu-a sawrkar hna kher beisei lova lehkha zir turin zirlaite chu a sawm a, an zir thiamna chu an zir chhuah hunah pawh a taka hmang thei tura an rilru siam tura fuihin, pawl 10 nih lai atanga Self employment ngaihtuah turin zirlaite chu a chah a ni.

Kumin HSLC Examination-ah hian Serchhip-a High School 9 awm zingah High School 4 atangin Distinction-a pass mi 14 an awm a, Presbyterian English School atangin zirlai 7-in Distinction-ah an pass a, Marian High School atangin zirlai 5 leh Zoluti Memorial High School leh Govt. Chhiahtlang High School atangin zirlai pakhat ve ve an pass bawk a, heng zirlai Distinction-a pass mi 14 te hnenah hian chawimawina thuziak leh lehkhabu hlan a ni.

Zirlai titha chawimawina hlan bakah hian Zirtirtu tha chawimawina, Pu Lalzuiliana, Govt. JM High School Headmaster thin, DEO-a kaisang ta hnenah hlan a ni bawk.

He hunah hian MZP Gen. Hqrs. atangin MZP hruaitute bakah Serchhip-a High School zirlai naupangte leh thuthar lakhawmtute an tel a ni.

Source: DIPR, Serchhip