SERCHHIP TOWN AREA A PIK-UP, 407/709 LEH 909 TRUCK HMAN MAN SIAM THAT A NI


Serchhip: 24th May, 2012: Vawiin khan Serchhip DC Meeting Room ah Serchhip Town Area Rate and Wages Control Committee chu an Chairman leh District Bawrhsap ni bawk Pu P.Lalchhuanga hovin an thukhawm a, Serchhip a khualzin phur leh motor hire theih a service pawl hrang hrang aiawhte leh Sa Zuar Association te pawh telin STARWCC in rate hrang hrang zirchiang tura a ruat sub-committee report leh ruahmanna te an thlir hova, hetiang hian thutlukna siam a ni.

1. Sa Zuar Association aiawh ten Bawng Sa rate tihpun sak tura an dilna chu uluk taka ngaihtuah anih hnu in tun dinhmunah chuan Sa rate hi a ngai kalpui leh phawt tha an ti a, hetih rual hian Sa rate hrang hrang Bawngsa, Arsa, Vawksa, Sangha (Lui/Dil/ Phai Sangha), Kelsa leh Uisa rate te pawh mumal zawka kalpui anih theih nan a zirchiang tur Study Group member panga awmna ruat a a rang lama report thehlut tura tih a ni a. Hei bakah hian Study Group hi Serchhip Carpentry Association te lo dawr a, thing zai phelna rate an hman lai mek zirchian sak a, rawtna thehlut tel tura beisei an ni bawk.

2. Serchhip a Taxi Auto Rickshaw rate chu beisei loh deuh a tunhnaia Petrol man litre khata Rs. 7.50/- laia a san tak thut avangin tun dinhmunah chuan rate ngai hi la kalpui rih a, petrol man chungchanga harsatna te chinfel anih hnu a ngaihtuah that leh tura tih a ni.

3. Town Bus Rate hmanlai mek chu tihdanglam tul lova hriat a ni a, hetih lai hian rate hman lai mekah School naupang Uniform ha te chu rate pangngai chanve chauh chawi tura tih chu zawm that a hlawh loh thu report dawn a ni a, hei hi Town Bus neitute chu zawm nghal tura hriattir an ni.

4. Pik-Up/ 407/LPK/709/909 : Sub-Committee in uluk taka a zirchian hnu a rawtna a siam te chu uluk taka sawiho anih hnu ah lungrual taka pawm tlan a ni a, order chhuah anih veleh rate thar hi hman tan nghal tur a ni ang. Truck Owners’ Association hotute pawhin thu tlukna ah lungawilohna an neih loh thu an sawi.

5. JCB hman man hi rate mumal taka khairualna a awm loh avangin Committee chuan darkar khatah Rs. 1500 a hman turin a bithliah a, darkar khat hi an hnathawh hun chhung ang a chhiar a ni ang.( in atanga JCB an chhuahpui rual a darkar khat hi chhiar loh tur a ni a, hnathawh laia an chawlh (thingpui/chhun chaw etc.) in chhiar tel loh tur a ni bawk ang)



Source: DIPR, Serchhip