SERCHHIP-AH SJSRY KALTLANGA BPL MEMBER TRAINING CHHUAKTE HNENAH CERTIFICATE LEH AN HMANRAW MAMAWHTE HLAN AN NI


Serchhip:24th April, 2012 : Vawiin chhun khan Serchhip DC Conference Hall-ah UD&PA buatsaih SJSRY kaltlanga BPL member Furniture Workshop leh Puan Thui (Tailoring) zir chhuak hmasa ber mi 40 te hnenah Certificate leh an hmanraw mamawh te hlan an ni a, he inkhawm hi District Bawrhsap Pu P.Lalchhuanga’n khuallian niin a hmanpui.

District Bawrhsap chuan trainee te chu BPL list atanga inkhaichhuak thei ngei tura an thiamna zirchhuah tharte chu chhawr tangkai turin a fuih a, BPL hruaitute leh VC te tang tlang a thawk tlang turin a chah nghal bawk. Bawrhsap chuan DLAO, DPO charge la mek tu ni bawk Pu ST Lalhmingmawia leh a thawhpuite thahnemngaihna leh inpekna fakin thawktu pek belh chuang lova Sawrkar thuneituten UD&PA lo hmui tel tura tih anihna phunnawi lo leh tlin taka an thawh avangin lawmawm a tih thu a sawi bawk.

Vawiin inkhawm kaihruaitu Pu ST Lalhmingmawia, DPO (SJSRY) chuan SJSRY hnuaia BPL Training hi Serchhip ah a vawikhatna anih thu a sawi a, kum kal ta chhung khan BPL te tan hmun hrang hrangah inhlawhna siam sak an nih thu leh mihring tha 2000 chuang chhawr anih thu a sawi a, tunah pawh BPL te puala hman tur sum a la awm a, heng te hi loan atana hman tur te, trainingna atana hman tur te leh Self-Help Group te tana hman tur anih thu tarlangin BPL hruaitute nen tan la tlanga ruahmanna siam leh zel tur anih thu a sawi a, thawktu indaihlohna avanga duh anga hma an la chak thei lo chu pawi a tih thu a sawi bawk.

SJSRY kaltlanga BPL member ten eizawnna kawng an dap theihna tur kawng kawhhmuhna tur atana training buatsaih hi Serchhip District ah chuan a vawikhatna niin thlaruk course a ni a, September ni 15, 2011 atanga tan in February ni 16, 2012 ah an zo a, tun tumah hian Furniture Workshop leh Puan Thui (Tailoring) ah te training neih a ni a, Furniture Workshop ah hian mipa 11 inziaklutin, an zinga 10 in tluang takin instructor 5 hnen atangin training an zo thei a, Tailoring ah hian hmeichhia 21 leh mipa 9, an vaiin mi 30 in instructor 3 hnenah hlawhtling takin training an zo thei a ni.

Training Instructor te hlawh (Training Fee) atan hian Trainee pakhat zelah thlatin Rs. 500 lak niin Thlaruk chhungin Department in Rs. 1,20,000/- a seng a, Infrastructure Support atan Rs. 37,500/- sen ani bawk.

Trainee ten thla tina an stipend dawn tur Rs. 500/- chu Department in khawl sakin an training chhuahrual a an chhawr zui theih tur khawl (sewing machine) leh Electronic Randa a lei sak a, hengte hi vawiin hian trainee te hnenah hlan nghal an ni.

Puan Thui zirchhuakte hman tur Puan Thui khawl leinan Rs. 1,29,800/- sen niin Kut khawl 20 leh Ke khawl 12 lei a ni a, Kut khawl lei nan hian Rs. 65000/- (Rs. 3250x20) leh Ke khawl lei nan Rs. 64800/- (Rs. 5400x12) sen a ni a, stipend atanga chhutin mipakhat tan Rs 3000 chauh khawl sak theih an ni a, khawl leina atana balance awm zawng zawng chu UD&PA Department-in a tum sak a ni.

Furniture Workshop Trainee te hman tur Electronic Randa 10 lei nan Department-in Rs. 25500/- (Rs 2550x10) a seng a, stipend laktheih zat atanga paihin Furniture Workshop Trainee te hian balance Rs. 450/- theuh an hmu let leh bawk a ni.

Training na atana senso zawng zawng belhkhawm chu Rs. 3,12,800/- a ni.

Source: DIPR, Serchhip