SERCHHIP-AH NATIONAL VOTERS’ DAY VAWI 4-NA URHSUN TAKA HMAN A NI


“Democracy innghahna lungphum leh chakna chu voters’ te kan ni” - Juhi Mukherjee, IAS, Serchhip DC


Serchhip, 24th January 2014: Ramchhung hmun dang rualin vawiin chawhma dar 11:00 khan Serchhip DC Conference Hall-ah urhsun takin National Voters’ Day vawi 4-na hman a ni a, Serchhip District Election Officer, Bawrhsap ni bawk Pi Juhi Mukherjee IAS chuan khuallian niin a hmanpui a ni.

National Voters’ Day puala Voters EPIC dawng tharte chu lawmpuina thu hlanin Khuallian chuan khawvela Electorate lian ber ah an tel ve tih in hre tur leh EPIC an neih atang chiah hian ram inrelbawlna chungchangah sawi tur an nei ve a, an mawhphurhna pawh a sangin a pawimawh hle ani tih inhre turin a chah a, Democracy chakna hnar leh innghahna lungphum an ni a, EPIC hmang hian Sawrkar siam tura kan hlutna a in ang vek a, mitin kan intluktlang vek a ni a ti bawk.

Pi Juhi chuan nikum kumtawpa Mizoram Legislative Assembly inthlanpui neih taka Serchhip District in vote tlak thatna ber pahnihna a hauh leh inthlanna felfai leh thianghlim tak neih anih chhan chu field-level a thawktu hrang hrang Booth Level Officer te, Election official te, NGO te leh mahni mawhphurhna ngaipawimawhtu voters te vang ani tiin lawmthu a sawi a ni.

Vawiin inkhawmah hian kum kalta chhunga Serchhip District a Assembly Constituency pathuma BLO hna thawk tha ber thlanchhuah te hnenah lawmman Citation leh Tangkafai Rs. 3000/- theuh hlan an ni a, chung BLO tha thlanchhuah te chu :

26-Serchhip(ST) A/C : Pu Laltluangliana, BLO, Thenzawl-IV Polling Station
27-Tuikum (ST) A/C : Pu Lalthianghlima Varte, BLO, Chhiahtlang-V Polling Station
28-Hrangturzo (ST) A/C :Pu R.C. Laldailova, BLO, Keitum-II Polling Station

MLA Election 2013 a District chhunga Assembly Constituency pathuma Polling Station vote tlakthatna ber (in percentage) theuh ah pawh lawmman sem niin Citation leh Tangkafai Rs. 5000/- theuh hlan an ni bawk a, chung Polling Station te chu :

26-Serchhip(ST) A/C : Buangpui Polling Station (95.30%)
27-Tuikum (ST) A/C : Buhkangkawn Polling Station (96.36%)
28-Hrangturzo (ST) A/C : Hriangtlang Polling Station (91.47%)

BLO tha lawmman leh Polling Station titha lawmman hi District Election Officer Pi Juhi Mukherjee, IAS in a hlan a ni.

Khuallian hian vawiin inkhawmah vek hian Electoral Roll a hming chuang tharte hnenah an EPIC a hlan bawk a ni.

Vawiin inkhawm hi Pu Lalsangliana, MCS, Addl. D.C. Serchhip-in a kaihruai a, inkhawm tan veleh Natiuonal Voters’ Day 2014 puala voters te thutiam chham rual a ni a, Chief Election Commissioner thuchah chhiarchhuah anih bakah BLO te pawhin an hnathawh chungchanga harsatna an tawhte leh an hlawhtlinna te sawina hun benglut tak an hmang bawk a ni.

Source: DIPR, Serchhip