DAMDAWI HMANG LOVA THLAI ENKAWL DAN TUR LO NEITUTE ZIRTIR


Dated Serchhip, the 23rd March, 2017: Vawiin chawhma dar 11 khan Agriculture Conference Hall, Serchhipah Mission Organic Mizoram (MOM) te bul tumin Serchhip District chhunga Loneitu thlan bikte te hnenah Damdawi hmang lova thlai enkawl dan tur ‘ Farmers Training on Organic Farming’ neih a ni.

He hunah hian Pu Lalringliana, SDAO Serchhip chuan thu sawiin Loneituten thar chhuah tam zawk neih kan duh avang leh rang taka thlai thar chhuah kan duh thin avangin tunlai thiamna hmanga siam chhuah lei tih thatna leh bawlhlo chi hrang hrang kan hmang nasa ta hle a, hei hi mihring hriselna atana thalo a ni tih hriatchhuah zel a ni a ti. Chuvang chuan hetiang bawlhlo tel lova lo neituten kan thlai chinte kan enkawl hi a tul tawh tak zet a, heng bawlhlo kan hman thinte hian mihring hriselna a khawih pawi mai bakah kan ram leilung a ti chhia a, siam tha leh tur chuan kum rei tak nghah a ngai leh thin ani. chuvang chuan vawiin mithiamten zirtirna an pek te pawh lo neituten uluk taka ngaithla a, bul kan tan thar lehna tur ani tih ngaihtuah chung a, taima taka he training hi hmang turin kalkhawmte a chah a ni.

Pu Lalhmingmuana, State Coordinator, Mission Organic Mizoram chuan kalkhawmte chu zirtirna pe in, Mission Organic Value Chain Development for North Eastern Region chungchang a sawi fiah a. He Scheme hian a tum ber chu tur leh damdawi, mihring leh leilung tana hlauhawm theite hmang lova thlai thar ngei ani tih finfiahna (Certified) kawnga hmalakna leh loneitute leh a dawrtute inkara palai hnathawh a ni a. Chumi bakah chuan thlai sawngbawlna kawnga hmalak puitu tur an nih thu a sawi bawk.

He scheme hi Directorate of Agriculture, Mizoram enkawlna hnuaiah chak taka kalpui mek a ni a, he scheme hian North East-a state hrang hrang- Assam, Manipur, Meghalaya, Mizoram, Nagaland, Sikkim leh Tripura te a huam a. Tunah hian Mizoram District paruk- Aizawl, Lunglei, Serchhip, Kolasib, Mamit leh Champhaiah te nasa zawka hma lak mek a niin, thlai thlan bik- Sawhthing, Aieng leh Mizo Hmarchate chingtute hnenah zirtirna pek mek rih a ni a ti a. Kumin thlai chi thlak hma ngeia heng District hrang hranga loneitute hnenah hian zirtirna hi pek chhuah hman an beisei thu a sawi bawk.

He hun hi Pi Lalchhuansangi, DPD (ATMA) Serchhip District chuan kaihruaiin, Serchhip District chhunga khaw hrang hrang 9 atangin Mizo Hmarchate chingtute mi thahnem tak an tel a ni.

Source: DIPR, Serchhip