SERCHHIP DISTRICT MJA PRESS TOUR A HLAWHTLING


Serchhip, 23rd March, 2014: Kolasib District chhunga Sawrkarin hmasawnna hna a thawh mek chi hrang hrang zirchiang tura kal Serchhip District MJA member te chu nimin tlai khan tluang takin Serchhip ah an kir.

Serchhip District MJA member te hian March ni 20, 2014 (Ningani) khan Serchhip chhuahsanin Kolasib an pan a, NH-54 lamah kalinMizoram PWD hnuaia Kawnpui leh Buichali inkar kawng siam mek lai an en nghal a, he kawng kilometre 30 a thui hi package hnih (Package I hi kilometre 15, Package II hi kilometre 14.789) a then niin kawng siam hna Contract thawk turin ABCI Ltd. thlan an ni. Serchhip District MJA te hi Pu Henry Lalmuankima, S.E., NH Circle-II, Pu Lalnuntluanga, SDO, NH Sub-Division V leh P.L. Dhiman, Project Director, ABCI ten Buichali ah lo hmuakin kawng Mualkhang Gas Bottling Plant hnuaia RCC Retaining Wall siam lai mek te, Kawng thar laih (Diversion Section) mek te pawh an tlawh ho nghal a, chanchinbumi ten kawng siam chungchanga harsatna an tawh chungchang zawhna chhangin Pu Henry-a chuan Mizoram chu ruahtui tamna anih bakah Revised Estimate sanction tlai vang te, ram mamawh compensation pek tur te Land Acquisition tihfel loh te a la awm avanga duh anga hna an thawk chak thei lo chu hrehawm an tih thu a sawi a, theihtawp chhuah a hma an lak reng thu leh an beisei anga hna a kal tluan chuan nikum fur laia kawng chhiat vanga harsatna nasa tak kha pumpelh thei ngei a an inrin thu a sawi bawk. Hei bakah hian kawng siam tawh sa thawm that ngai te thawm that hna an thawh tan thu leh karhnih chhungin an zawh vek dawn thu a sawi a, Diversion section hi Fur a lo thlen huna motor lianin kawng a zawh tluan theih nan April ni 20, 2014 hma a pavement work thawk zo vek tura Contractor te an hriattir tawh thu leh hemi hnu hian kawng hlui 2-lane a zauh ngai lai (Diversion ni lo) zawng hi thawh chhunzawm leh a kumin December thla ral hma a hna pumpui zo fel vek tura ruahmanna an siam thu a sawi bawk a ni.

March ni 21, 2014 (Zirtawpni) zing dar 6:00 ah bul tanin Serchhip MJA te hian Kolasib Diakkawn a NLUP Industry Trade atana Restaurant (Rin Rin Restaurant) thlang tu Pu R.Lalrotluanga (k-34) te an tlawh a, an ni hian an nupa in he Restaurant hi an buaipui a thla khata an hlep hi chawhrualin Rs. 23,500/- vel a ni tawh a ni. Kolasib atanga kilometre 20 a hla Bukvannei a Agriculture Department leh Godrej Agrovet Ltd. ten Oil Palm Mill an sak mek chu zingkarah hian an tlawh nghal a; kum 2012 September ni 15 khhan Mizoram Chief Minister Pu Lalthanhawla’n lungphum phumin hna thawh tan a ni a, April chawlhkar hmasa bera hawn hman tura chak taka hma lak mek a ni bawk. Oil Palm Mill hi darkar khat a Oil Palm Metric Ton 5 her thei tur ni in, ram Acre 27.8 a zau ah Mill hi bun a ni a, chemical tel miah lova Oil Palm siam chhuah hna hi thawh a ni dawn a ni.

Oil Palm Mill an tlawh zawh hian Chemphaia Soil & Water Conservation Department in NLUP tan liau liau a Rubber Nursery an siam chu an tlawh a, he Nursery ah hian Polypot 40,000 a awm a, an zinga 13,000 hi a chhiat avangin 27,000 chauh a nung a, amaherawhchu Hortoki leh Rajdali a an Nursery ah Polypot 8000 vel a awm sa bawk avangin NLUP mamawh chu an phuhru tho dawn ani tih Department official ten Serchhip District MJA te hi an lo hrilh a, Chemphai Nursery atana senso zawng zawng hi NLUP pawisa atanga siam a ni a, budded stand hi Tripura atanga lak chhoh niin Nursery ah hian an lo enkawl a, NLUP 3rd leh 4th Phase Beneficiary te tan a ruahman niin May thla chhungin an semchhhuak vek dawn a ni.

Chemphaiah vek hian NLUP 1st Phase hnuaia Fisheries Department kaltlanga Sangha Dil siam te an tlawh nghal a, Pi Silchuhthangi Sangha Dil bigha 4 a zau, a boral hnu a a tupa C.Lalhmuchhuaka’n a enkawl sak zui te, Pu Vanlalchhuanga Sangha Dil bigha 3 a zau leh Pi Nubuangi Sangha Dil bigha 3 a zau te an tlawh a, Pi Silchuhthangi Sangha Dil atang hian kum tin Sangha quintal 8 vel hralh chhuah ziah a ni a, Pu Vanlalchhuanga hian quintal 5 vel leh Pi Nubuangi hian quintal 6 vel a hralh chhuak ziah bawk.

Chemphai an tlawh zawh hian kawlphetha Megawatt 12 pechhuak thei Serlui ‘B’ Hydel Project an tlawh in chipchiar takin an fang a, Pu Lalthanzuala, SDO, Serlui ‘B’ Hydel Project in lo kaihruaiin an hnathawh dan kalphung te a hrilhfiah a ni. Serlui ‘B’ HEP Rs. 210.12 Crore senga din a ni a, civil work hi MECON Consultants ten thawkin BHEL (Bharat Heavy Electricals) ten Mechanical work an thawk thung a ni. Kum 2010 April tha atang power generation neih tan a ni a, March ni 20, 2014 thleng khan 102755483 unit generate tawh a ni a; chu chu unit khat Rs. 3.50/- a chhutin Rs. 35.96 Crore man vel power a generate tawh tihna a ni. Serlui ‘B’ Power House chhunga Generator pathum te hian 6.6KV level in power an siam chhuak a, chu chu step-up transformer in 33KV level ah tihsan leh a ni a, chu chu Grid nen synchronised in Bawktlang 132 KV sub-station, Kolasib lamah thawnchhuah leh thin a ni. Heng khawl te hian kum khatah 44.68MU siam chhuak tura beisei niin kum 2012-2013 khan 39.61MU a siam chhuak thung. Tun dinhmunah hian Khawl pathum zinga pahnih te hi chhawr an ni a, heng khawl pahnih hian chawl miah lovin 24/7 in hna an thawk a, 8MW bawr vel a tharchhuah ve reng avangin phai lam atanga kawlphetha lak luh a ti tlem a, Sawrkarin kawlphetha leina tura sum tam tak a pek thin pawh engemaw chen a lo chhawk zangkhai ve a, khawl pathumna (Unit-III) erawh chu a Governing System (speed control na) leh MIV (Main Inlet Valve) lam te duhthusam anih loh avangin siamthat leh tura hma lak mek a ni a, fur pui lo thlen hma a siamthat theih an inbeisei a ni.

Serlui ‘B’ HEP atang hian kilometre 30 vel a hla a awm North-Eastern Hydro Electric Power Corporation Ltd. (NEEPCO) ten Saipum khaw bula an thawh mek kawlphetha Megawatt 60 pe chhuak thei tur Tuirial Hydel Project tlawh nghalin chipchiar takin an fang a, he kum 1998 atanga thawh tan a ni a, harsatna tawh anih avangin June ni 9, 2004 atang khan chawlhsan vang vang a ni a, Project cost te revised (Rs. 913.63 crore) a nih hnu ah Mizoram sawrkar hmalak na in bul tan that leh a ni a, January ni 14, 2011 atang khan hna thawh chunzawm leh a ni. Head of Project Pu R.B.Sharma chuan Serchhip District MJA te zawhna chhangin tunah hian hna thawh tur zinga 60% chu thawh zawh anih tawh thu a sawi a, kum 2015 chhunga engkim zawh fel an in beisei thu a sawi bawk. He Tuirial HEP atanga kawlphetha siamchhuah atang hian 12% a thlawnin Mizoramin a dawng ang a, a bak zawng pawh hi State danga hralh lovin Mizoram sawrkarin a lei vek dawn a ni.

Serchhip District MJA Press Tour a kal te hi 13 an ni a, anmahni kaihruaitu Andrew H. Lalremruata, MIS, DIPRO Serchhip leh I&PR Technician te nen an vain mi 15 an ni a, I&PR Department leh NLUP Implementing Board kaltlanga tirh niin Kolasib District a an cham chhungin NLUP Line Departments, PWD, P&E Department leh Kolasib District MJA hruaitu ten an lo dawngsawng a ni. Kolasib District MJA te hian an kalna apiangah an tawiawm zel bawk a ni.

Source: DIPR, Serchhip