ARTICLE 275(1) HNUAIA DISTRICT PLANNING COMMITTEE TE THUKHAWM


Dated Serchhip, the 23rd February, 2017: Vawiin hian Serchhip District Planning and Monitoring Committee on Article 275(1) te chuan Bawrhsap pisaah line Department hrang hrangte Tribal Sub Plan siam enfiahna, an Chairman leh Bawrhsap ni bawk Dr. Lalrozama, IAS hovin an nei.

Dr. Lalrozama chuan, tribal mipuite tana India ram sum bawm atanga a hrana chheh ngat, India danpuiin duhsak taka min enkawlna rahchhuah hmang turin Serchhip District a inbuatsaih a ni a. Kan hman theih tur sum lokal chu a tlem emaw a tam emaw, a lokal chhan kan mipuite tana tangkai ngei tur thawh nan kan hmang tur a ni. Chuvang chuan a tir ruahmanna atanga fimkhur tak leh felfai taka kan inpuahchah a ngai a, kan mamawh dik tak kan chian pawh a tul a ni, tiin line Department aiawh kalkhawmte a fuih a. Ruahmanna awm ang ang te chu tha thawkhat viaua a hriat thu a tarlang bawk a ni.

India ram danpui, Constitution Article 275(1) behchhana ram chhunga tribal mipuite tana hmasawnna tur hnathawhna (tribal development programme) sawrkar laipuiin a rawn ruahmannaah kum 2016-17 sawrkar kum chhung atan Serchhip District pawh Rs.151.29 lakhs vel ruahman sak a ni a. He Serchhip District tana ruahman sum hi mipuite tana tangkai taka hman a nih theih nan hmasawnna kawng hrang hrang Education, Health, Agriculture & Allied, Commerce and Industries, Administrative Structure, Skill Development leh Sports lam atan te semdarh leh a ni. Heng kawng hrang hranga hnathawh dan tur hi a bawhzui tura thlan Department te chuan plan an siam a. Chung an plan siamte chu vawiin hian District Level Planning and Monitoring Committee chuan chipchiar takin an enpui a ni.

Vawiina meeting hian line Department plan thenkhat siamthat ngai la awm nia a hriat thenkhatte a siam rem hnuin thuneitu sang zawk, State Level Committee lama thehluh atan a pawm ta a ni.

Vawiina meeting ah hian member te an kal kim tha hle a ni.

Source: DIPR, Serchhip