DISTRICT TASK FORCE ON IMMUNIZATION COMMITTEE THUKHAWM


Dated Serchhip, the 23th January, 2017: Vawiin hian Serchhip District Task Force on Immunization Committee te chu an Chairman leh Bawrhsap ni bawk Dr. Lalrozama, IAS Pisaah an thukhawm a, January ni 31 a Zenghri danna pek runpui (IPPI First Round) neih dan tur an rel.

Chairman Dr. Lalrozama chuan, India ram chu Zenghri awm lohna rama puan ni tawh mahse kan thenawm ram atangte in he natna hi la rawn lut thei reng a, Mizoram pawh Myanmar leh Bangladesh nena inri leh mihring intlawhpawh tawn reng kan nih avangin Zenghri hi rawn lang leh palh thei a ni. Hei vang hian Zenghri Danna pek hi chawlhsan theih a la nilova, kumin atan First Round kan tan leh dawn a ni, a ti a. Serchhip District chhunga mipuite chu an khuaa naupang, kum 5 hnuai lam zawng zawng chu he hri danna hi lo ei tir vek tur leh an khuaa mikhual awm, khaw dang mi leh Foreigner awmte pawh kum 5 hnuai lam an awm chuan lo ei tir vek tura thawktute lo tanpui turin a sawm a ni.

Kumina Zenghri Danna pek beihpui thlak First Round hi January 31 ah Booth zawng zawngah neih tur a ni a, a tuk February ni 1 leh ni 2 chu thawktuten in tin tlawh kual nan an hmang chhunzawm ang. Chumi hnuah Booth tin Supervisor ten khawtina naupangten an ei vek leh vek loh an endik leh vek dawn a ni. Second Round pawh April thlaah neih zui lehnghal a ni ang.

Vawiina District Level Task Force thukhawmte hian nikum lama hnathawh tawh dante an thlir let bakah kumin Beihpui Thlakna atana thil tul chi hrang hrangte an rela, thawktute training inpek dan turte, a hawnna inkhawm neih dan turte leh mipui zawng zawng hriat tura hriattirna pekchhuah dan turte an sawi khawm a ni.

He Beihpui thlaknaah hian Serchhip District ah target (naupang kum 5 hnuai lam) mi 6271 an awm nia chhut a ni a, a pekna tur hmun Booth hi 71 a awm thung a ni.

Vawiina meetingah hian Chief Medical Officer, Dr Laldawngliana Sailo, District Hospital Medical Superintendent Dr DZ Lalmuanawma, District Immunization Officer Dr. Lalhlunpuii, District Child Development Project Officer Pi Vanlalhruaii leh Serchhip Joint Village Council aiawhte leh mi pawimawh dangte an tel a ni.

Source: DIPR, Serchhip