SOCIAL WELFARE MINISTER IN SERCHHIP KAWLRI-A EKLAVYA MODEL RESIDENTIAL SCHOOL SAK MEK TLAWH

“2015-16 Academic Session tan ruala Class tan hman tum a ni” – PC Lalthanliana


Serchhip, 23rd January, 2015: Social Welfare Department changtu Minister Pu PC Lalthanliana chuan vawiin chawhma dar 11:00 khan Serchhip Kawlri tlanga Rs. Vaibelchhe 12 seng a Eklavya Model Residential School (EMRS) sak mek chu a tlawh a, kumin April thla a Class tan hman ngei tura inpeih fel turin PWD, Social Welfare Department hotute leh a satu contractor te a hrilh.

Minister zawhna chhangin Pu Lalzarliana, EE, PWD chuan April thla a class tan hman ngei tura an inpeihfel dawn thu a sawi a, hna thawh tur rip zualpui chu zawhfel vek anih tawh thu in a chhang a ni. Pu Vanlalnghaka Zote, Dy. Director, SWD pawhin kumin April thla atang hian Class VI, VII leh VIII tan nghal tura ruahmanna an siam thu leh kum tin Class thar hawn belh zel a Class XII zirna thleng hawn anih tur thu a sawi bawk. Hnathawktu Contractor te pawhin theihtawp an chhuah thu leh Minister duh dan ang ngeia a hun taka an inpeihfel hman tur thu an sawi bawk a ni. Minister chuan Eklavya School chu mirethei leh chhumchhia ten zirtirna changkang leh belhchian dawl an hmuh theihna tura Sawrkar Laipuiin ruahmanna a siam anih thu sawiin Lungleiah Eklavya School changtlung tak din anih tawh thu te, kumthar a Saiha District a Eklavya Model Residential School din tura hma chak taka lak anih thu a sawi bawk.

Eklavya Model Residential School hi Scheduled Tribe naupang rethei leh chhumchhia ten a thlawna lehkha an zir theihna tur Sikul changtlung tak, Hostel awm nghal ni bawk tura ruahman niin, Sawrkar Laipui a Ministry of Tribal Affairs in India Danpui (Constitution) Article 275 (1) hnuaiah a sakna tur sum hi a pe chhuak a, tunah hian Phase-I atan Rs. Vaibelchhe 12 ruahman niin, Phase-I ah hian Administrative Building, School Building Block-I, Boys Hostel Block-I, Girls Hostel Block-I, thawktute chenna tur Type-I Quarters pakhat (4 units), Type-II Quarters pahnih (4 Units ve ve) leh Type-III Quarters (Principal chenna tur) pakhat sak a ni a , Internal Road leh Electricity pawh tel nghalin Internal link road hi laih zawh tawh niin black topping pawh hi zawhfel tawh a ni a. Electrict Transformer pawh bun fel tawh niin Electrict ban phun fel vek tawh a nih bakah Electric hrui nen thlun zawm vek a ni tawh a, tuizem lian Litre nuaih 2 dawng pahnih tunah hian sak mek a ni bawk.

Hostel hi Serchhip District chhunga naupang rethei leh chhumchhiate tana buatsaih niin an zirna atana senso zawng zawng bakah an mamawh dangte Sawrkarin a tum sak vek dawn a, Social Welfare Department in a enkawl dawn a ni. Serchhip EMRS hmun hi 5572 Sq.m vela zau niin EMRS hi Lungleiah din a ni tawh a, Serchhip a mi hi Mizorama a pahnihna tur a ni a, He School hi a hmuna enkawl turin Sawrkarin District Bawrhsap kaihhruaina hnuaiah Committee a din a, School Principal, Serchhip CDPO, DEO leh Serchhip Sub-Headquarters YMA President te member an ni ang.

EMRS, Serchhip hi zawh fel anih hnuah chuan Auditorium pakhat, Playground pahnih, Basketball Court pakhat, Girls Hostel Block hnih, Boys Hostel Block hnih, School Block hnih, thawktute chenna Quarters Type –I pahnih, Type-II Pasarih, Type-III pakhat, Computer Room etc., awm tura ruahman a ni.

Minister hian Eklavya School a tlawh hnu hian Buangpui khaw daia khualzin te hiptu Tuirihiau chu tlawhin a hlutna leh a ziarang tichhe lova cheimawi dan tur a en nghal a ni.

Source: DIPR, Serchhip