INSPIRE AWARD


Dated Serchhip, the 22nd September, 2016: Ni hnih chhung awh tur, Inspired Award hnuaia State leh District Level Exhibition and Project Competition vawi 6-na, Serchhip DEO leh SCERT te tangkawpin Government Serchhip High School a an huaihawt chu vawiin khan Serchhip Bawrhsap Dr. Lalrozama, IAS chuan a hawng.

A hawnna inkhawm tak hi BNRGSK Hall, P & E vengah neih a ni a, Exhibition hi Government High School ah hian neih a ni thung.

He State leh District Level Exhibition and Project Competition hawngtu Dr. Lalrozama chuan thilthar hmuhchhuah lama rilru leh ngaihtuahna seng zirlai naupang thahnemtak an awm chu lawmawm a tih thu a sawi a, hmsawnna thlen tur chuan thil danglam kan mamawh a ni , a ti. Mitin hian tuina bik leh thiamna bik kan nei deuh veka, chungte chu Pathianin kan talent atana min pekte an ni, chung thilte haichhuah thiama, tangkai taka hman thiam hi kan nunkhua atan a tangkaiin a tul em em a ni, a ti bawk.

Hawnna inkhawm, Pu Lallawmawma, DEO Serchhip kaihhruaia neihah hian Pu F. Lalliansanga, Science Consultant, SCERT chuan report pein kum 2010 atanga kum 2020 thleng chu thil thar hmuhchhuah kumah puan a nih thu a sawi a, Inspired Award kalphung leh a thil tumte sawifiahna hun a nei bawk.

State leh District Level Exhibition and Project Competition hawnna inkhawm neih zawh hian intihsiak neih tan nghal a ni a, intihsiakna hi Govt. Serchhip High School -ah neih niin Khuallian, Dr. Lalrozama, IAS, Serchhip Bawrhsap chuan a tlawh nghal a, District hrang hrang atang kalkhawm zirlai naupang 62 te Exhibition ah hian an inpho chhuak a ni. He State Level inelnaa tithate chu National Level ah Mizoram aiawhin an kal leh ang.

INSPIRE Award hi Ministry of Science & Technology hnuaia sawrkar laipui Flagship Programme a ni a, Kum 2010 atanga bul tan niin India ramin Science & Technology lama chak zawka hma a sawn theìhna tur leh, zìrbingna (research) lama mi tam zawkte an kal theih nan, naupang an nih lai atanga mite kaihhruai hi a tum ber a ni.

Source: DIPR, Serchhip