THENZAWLA INDEPENDENCE DAY, 2014 LAWM DAN TUR SDO(C) HOVIN REL A NI


Serchhip, 22nd July, 2014: Vawiin chawhma dar 10:00 khan Thenzawl SDO(C) Pu K. Lalhmuakliana, MCS hovin a pisa ah Thenzawl khawchhunga Sorkar Department leh NGO hrang hrang, khawtlang hruaitu ten Thenzawl Sub-Division huamchhunga kumin August 15, 2014-a India Independence Day lawm dan tur an rel.

Vawiin a rel lawk dan chuan Independence Day-hi Thenzawl Public Playground-ah August ni 15, 2014 chawhma dar 10:00 ah hman tur a ni a, Khuallian tur chu Sorkar-in ruahmanna a siamdan ngaihchan a ni ang. India Independence Day lawmnaah hian Thenzawl Sub-Division huamchhung ami Zirlai Board Exam-a Top Ten a tling chin te, Infiamna leh Sorkar hnathawh kawnga chawimawina (State leh National Award) dawng chin te hnenah chawimawina leh lawmpuina hlan ani ang a, Sorkar Department hrang hrang ten Independence Day lawm huna an tih tur pual chanvo an in tuk nghal a, Independence Day pual hian Thenzawl Zone Football Association huaihawtin Football Tournament neih tura ruahman anih bakah; Thenzawl khawchhunga YMA Branch hrang hrang tan Inhruipawh-a infiamna neih ani bawk ang.

Kumin Independence Day hi Elementary School zirlai exam lai nen a inhnaih chilh lutuk avangin High School chin chauh March Pass Contingent atan hman an ni bawk ang.Vawiin Independence Day lawm dan tur relna ah hian Thenzawl khawchhunga Sorkar Department leh V/C, NGO leh Media aiawh an kal tha hle a ni.

Source: DIPR, Serchhip